«һудәйдә» дә уруш тохтитиш келишими иҗра қилинишқа башлиди

түркийә авази радийоси хәвири: мәлуматларға қариғанда, уруш тохтитиш келишими, бирләшкән дөләтләр тәшкилатиниң көзитиши астида шивейтсарийәдә ишқа ашурулған музакириләрдә йәмәнлик тәрәпләр ара һасил қилинған келишимгә асасән, «һудәйдә» шәһиридә шу җай вақти  саәт 0 дин етибарән иҗра қилинишқа башлиған.

йәмән хәлқигә нисбәтән наһайити зор әһмийәткә игә болған »һудәйдә порти» вә «һудәйдә шәһири» үчүн һасил қилинған келишимгә асасән, «бирләшкән дөләтләр тәшкилатиниң портта рәһбәрлик қилиш роли» ни җари қилдуруши, йәмәнгә инсанпәрвәрлик йардәм буйумлирини йәткүзүп бериш үчүн шараит йаритип берилиши, бу арқилиқ миңларчә йәмән хәлқиниң турмуш шараитини йахшилаш нишаниға йетилиши күтүлмәктә икән.

шәһәрдә түнүгүн һөкүмәт күчлири билән һусийлар оттурисида йеқинқи бир һәптидин буйанқи тоқунушлар интайин кәскинлишип кәткәниди.

йәмән ташқи ишлар министири халид йәмани һудәйдә  наһийәсидә уруш тохтитиш келишиминиң 18 – декабир сәйшәнбә күни саәт 0 дин етибарән иҗра қилинишқа башлиғанлиқини билдүргәниди.

бирләшкән дөләтләр тәшкилати баш катипи антонио гутеррес 13 – декабир күни шивейтсарийәдә ахирлашқан «йәмән» темилиқ кеңәш  йиғинлиридин кейин елан қилған байанатида, йәмән хәлқи үчүн наһайити зор әһмийәткә игә  болған«һудәйдә порти» вә «һудәйдә шәһири» үчүн тәрәпләрниң келишим һасил қилғанлиқини уқтурғаниди.

игилинишичә, тәрәпләр келишимгә риайә қилидиғанлиқлирини билдүргән болуп, шәһәр аһалиси тинч йашимақта икән.