нато косова хәвпсизлик қисимлириниң армийәгә өзгәртилишигә наразилиқ билдүрди

түркийә авази радийоси хәвири: шималий атлантик әһди тәшкилати-нато баш катипи җенс столтенберг, косова хәвпсизлик қисимлирини армийәгә өзгәртишкә мунасивәтлик қанун лайиһәсиниң  мақуллинишиниң һазирчә тоғра әмәсликини вә әндишә пәйда қилғанлиқини билдүрди.

баш катип столтенберг бу һәқтә йазма байанат берип мундақ деди: «косова хәвпсизлик қисимлирини армийәгә өзгәртишни косова өзи қарар қилиши керәк, бу уларниң иши, бирақ бу һазир беридиған қарар әмәс иди, биз һазирчә буниң қарар қилинмаслиқини тәкитләп кәлдуқ.»

столтенберг натониң косова хәвпсизлик қисимлирини армийәгә өзгәртишкә қарши чиқип келиватқанлиқини, бирақ косова һөкүмитиниң бу қарариниң  әндишә пәйда қилғанлиқини әскәртти.

натониң косова хәвпсизлик қисимлирини бурундин тартип қоллап келиватқанлиқини ейтқан баш катип столтенберг, буниңдин кейин нато билән косова «армийәси»оттурисидики мунасивәтни қайтидин көздин кәчүрүп чиқидиғанлиқини ейтти.

баш катип столтенберг шималий атлантик әһди тәшкилати-натониң косова тинчлиқ сақлаш қисимлири  вастиси арқилиқ косованиң хәвпсизликини сақлаш үчүн күч чиқиришни давмлаштуридиғанлиқини әскәртип, барлиқ тәрәпләрни сүркилишни техиму улғайтмаслиққа чақирди.

косова хәвпсизлик қисимлирини армийәгә өзгәртишни мәзмун қилған қанун лайиһәси косова парламентида мақулланғаниди.

косова парламент әзалири косова хәвпсизлик күчлириниң вәзиписи, хизмәт шараити вә косова хәвпсизлик қисимлири министирлиқини мудапиә министирлиқиға өзгәртишни мәзмун қилған үч қанун лайиһәси үчүн беләт ташлиди.

мәзкур қанун косова пирезиденти һашим тачиниң тәстиқидин өткәндин кейин, косова хәвпсизлик қисимлири косова армийәсигә өзгәртилиду.