бейҗиң вашингтонни мең венҗу тоғрисидики қарарини қайтурувелишқа чақирди

түркийә авази радийоси хәвири: хитай ташқи ишлар министирлиқиниң байанатиға қариғанда, муавин ташқи ишлар министири ли йучиң, америка қошма иштатлириниң бейҗиңда турушлуқ баш әлчиси террй бранстадни ташқи ишлар министирлиқиға җиддий чақиртип, америкиниң, мең венҗу тоғрисидики «мәнтиқисиз тутуш буйруқиға қаттиқ наразилиқ билдүридиғанлиқлири» ни йәткүзгән.

вашингтон даирилириниң бу қилмишиниң хитай пуқралириниң қануний һәқ вә мәнпәәтлиригә еғир дәриҗидә хилаплиқ қилиш һесаблинидиғанлиқини вә буларға «һәддидин зийадә рәзил» дәп қарайдиғанлиқлирини тәкитлигән ли йучиң, «хитай, буниңға (хуавей әмәлдарини тутуш тәлипигә) қәтий қарши чиқиду. америка қошма иштатлирини хитайниң җиддий позитсийәсигә алаһидә әһмийәт беришкә, хата сийасәтләрни түзитидиған тәдбирләрни йолға қойушқа вә хитай пуқраси тоғрисидики тутуш қарарини қайтурувелишқа чақириду» дегән ибариләрни ишләтти вә сөзини давамлаштуруп, бейҗиң даирилириниң, қошумчә тәдбирләрни йолға қойуп – қоймаслиқиниң америкиниң һәрикәтлиригә мунасивәтлик икәнликини әскәртти.

бейҗиң, шәнбә күни канаданиң бейҗиңда турушлуқ баш әлчисини ташқи ишлар министирлиқиға чақиртип, канаданиң мең венҗуниң қануний һәқлирини қоғдиши керәкликини, әксичә болғанда, дөләтниң үстигә елиши керәк болған ақивәтләрниң оттуриға чиқидиғанлиқини билдүргәниди.

хитай технологийә гуруһи хуавейниң директори мең венҗу, америкиниң иранға йүргүзгән ембарголириға хилаплиқ қилғанлиқи илгири сүрүлүп вашингтон даирилириниң тәлипигә асасән, канада тәрипидин 1 – декабирда ванковер шәһиридә назарәт астиға елинған, вәқә һәптә ичидә җамаәтчиликкә уқтурулғаниди.

мең венҗуниң назарәт астиға елинишиниң америка пирезиденти доналд трамп билән хитай дөләт рәиси ши җинпиңниң аргентинада чақирилған 20 дөләт гуруһи башлиқлар йиғини җәрйанидики сода урушлири пәйда қилған соғуқчилиқни пәскуйға чүшүрүш мәқситидә өткүзгән учришиши әснасида йүз бериши диққәтни тартқаниди.

вәқәдин кейин хитай ташқи ишлар министирлиқи, мең венҗуни назарәт астиға алған канадани кишилик һоқуқни дәпсәндә қилиш билән әйиблигән вә хуавей әмәлдариниң вақтида қойуп берилишини тәләп қилғаниди.

хитай таратқулири болса, вашингтон даирилирини хуавейниң хәлқарадики инавитигә зийан йәткүзүшкә урунуш билән әйиблигән вә иттипақдашлирини хитайға бесим ишлитишкә мәҗбурлиғанлиқини йазғаниди.

мең венҗу түнүгүн канадада чеилған капаләт сотида америка банкилириға қарита сахтипәзлик қилиш билән әйибләнгән, канада әдлийә министирлиқиниң адвокати җон гиби-карслей, мең венҗуниң америка банкилириға хуавей билән хоңкоң мәркәзлик скайком ширкити арисидики мунасивәт тоғрисида йалған ейтқанлиқини илгири сүргәниди.