исраилийә ғәззәниң бирдин бир сода чегра еғизини тақиветидиған болди
қоршав астидики ғәззәдә тәхминән 2 милйон пәләстинлик йашайдиған болуп, 7 чегра еғизидин 6 си исраилийәниң, 1 си мисирниң контироллуқи астида турмақта.
түркийә авази радийоси хәвири: пәләстин һөкүмитигә қарашлиқ ғәззәгә мәһсулат киригүзүш кеңиши башлиқи раид футуһ елан қилған байанатида, «исраилийә даирилири бүгүндин етибарән чегра еғизини иккинчи буйруқ кәлгәнгә қәдәр пүтүнләй тақайдиғанлиқи һәққидә бизгә мәлумат сунди» деди.
раид футуһ ғәззәниң җәнубидики чегра еғизидин пәқәт дора киришигила рухсәт қилинидиғанлиқини қәйт қилди.
пәләстин қаршилиқ көрситиш һәрикити «һамас»му елан қилған байанатида, «исраилийәниң бу қарари пәләстин хәлқигә вә инсанийәткә қарши җинайәттур» деди һәмдә хәлқара җамаәтчиликниң бу һәқ – һоқуқ дәпсәндичиликигә сүкүт қилип турватқанлиқини тәнқид қилди.
мисирму ғәззә линийәсидики рәфаһ чегра еғизини бүгүндин башлап тақиғанлиқини елан қилди.
исраилийә қоршави сәвәбидин ғәззәниң дунйаға ечилидиған бирдин бир чегра еғизи һесаблинидиған рәфаһ чегра еғизи, мисирдики 2013 - йили 3 – ийулда йүз бәргән һәрбий - сийасий өзгириштин кейин көп қетим тақилип қалидиған болуп қалди.
тәхминән 2 милйон пәләстинлик йашайдиған қоршав астидики ғәззәниң 7 чегра еғизидин 6 си исраилийәниң, 1 си мисирниң контироллуқи астида турмақта.
исраилийә һөкүмити әскәрлириниң кирип чиқиши үчүн ишлитиватқан карарә чегра еғизини 2005 – йили, қалған 3 чегра еғизлирини 2007 – йили ғәззәни қоршавға елиш башланғанда тақап қойған иди.
исраилийә сода мәһсулатлириниң кирип – чиқиши үчүн кәрим әбу салим еғизиниң вә йолучиларниң кирип чиқиши үчүн бәйт һанун чегра еғизиниң ишлитилишигә рухсәт қилмақта иди.
исраилийә сода мәһсулатлириниң кирип – чиқиш еғизини җүмә вә шәнбә күнлиридин башқа йәнә, йәһудий байрамлиридиму тақап қойғандин сирт, бәзидә өзлири халиғанчә тақивелипму кәлмәктә.
исраилийә бу чегра еғизидин барлиқ сода мәһсулатлириниң киришигә русхәт қилмайду, бәлки қайси мәһсулатниң, қанчилик миқдарда өтишигиму чәклимә қойиду. болупму қурулуш әслиһәлириниң киришини қәтий чәкләйду.
киришкә рухсәт қилинған мәһсулатлар болса, миқдари җәһәттики чәклимиләр түпәйлидин хәлқниң еһтийаҗини қамдийалмай кәлмәктә.
