таҗ мәһәлдә җүмә намизи өтәш мәни қилинди

түркийә авази радийоси хәвири: һиндистан вақти гезитиниң хәвәр қилишичә, һиндистан йуқири сот мәһкимиси бу һәқтики һөкүмнамисигә «таҗ мәһәл дунйадики йәттә чоң мөҗизиниң бири болғанлиқи үчүн муһапизәт қилиниши керәк» дәп изаһат бәрди вә «аграда көп санда җамә бар, намаз өтәшни халайдиғанлар шу йәрдә өтисә болиду» дегәнләрни қәйт қилди.

һөкүмнамидә көрситилишичә, таҗ мәһәлдики мәсчиттә намаз өтәшни халайдиған мусулманлар, өзиниң аграда йашайдиғанлиқини дәлиллиши шәрт икән.

таҗ мәһәл, бабур шаһ қуруп чиққан һинд – түрк емпираторлуқиниң 6 – һөкүмдари шаһ җиһан тәрипидин 1631 – йили 14 – пәрзәнтини туғуш әснасида вапат болуп кәткән рәпиқиси әрҗумәнд бану бәгумға беғишлап салдурулған. 1632 – йили емпираторлуқниң шу чағдики пайтәхти агра шәһириниң йамуна дәрйаси бойиға селиниши башланған бу қурулуш, 20 йилда пүткән.

түрк – ислам бинакарлиқиниң әң йарқин үлгилириниң бири һесаблинидиған ақ мәрмәр таштин йасалған таҗ мәһәл, 82 метирлиқ гүмбизи билән диққәтни тартиду. «дунйадики ишқи – муһәббәткә беғишлап бәрпа қилинған әң чоң вә әң гүзәл хатирә» дәп қарилидиған бу көркәм қурулушниң наминиң, әрҗумәнд бануниң тәхәллуси болған мумтаз мәһәлдин елинғанлиқи илгири сүрүлиду.

таҗ мәһәл, шивейтсарийәдики New7Wonders вәқпи тәрипидин 6 йил бойичә авазға қойуш арқилиқ бекитип чиқилип, 2007 – йили елан қилинған «дунйаниң йеңи йәттә мөҗизиси» ниң бири һесаблиниду.