испанийә билән сенегал арисидики сүркилиш күчәймәктә
испанийәдә йаймикәшлик қилидиған икки сенегаллиқниң өлүми испанийә билән сенегал арисида сүркилиш пәйда қилди
түркийә авази радийоси хәвири: испанийәниң пайтәхти мадридта йаймкәшлик қилидиған икки сенегаллиқниң испанийә сақчилири сәвәбидин җенидин айрилиши тоғрисида тарқалған хәвәрләр испанийә билән сенегал арисида сүркилиш пәйда қилди.
сенегал пирезиденти макий сал мадрид шәһәрлик һөкүмәт башлиқи мануел карменадин гуманлиқ өлүм вәқәлири үстидә тәкшүрүш елип беришни тәләп қилди.
пирезидент сал испанийә даирилири билән бу мәсилини музакирә қилиш вә өлүп кәткәнләрниң аилә-тавабиатлириға тәсәллий бериш үчүн мадридқа мәхсус адәм әвәтти.
испанийәдики сенегал дийаспора башлиқи солейман әлион дийалло: йавропада йашаватқан нурғун сенегаллиқ бар, уларниң көп қисми зораванлиққа дуч кәлмәктә, деди.
испанийәдә дәрдини аңлайдиған бирму дөләт оргининиң йаки әмәлдарниң чиқмаслиқидин зарланған дийалло сөзини давамлаштуруп мундақ деди: «һазирғичә бирму сақчи үстидә тәкшүрүш елип берилмиди.»
мадридта йаймикәшлик қилип тирикчилик қилидиған 35 йашлиқ сенегаллиқ мамә мабийабә нидийайә пәйшәнбә күни сақчилардин қечиш әснасида йүрәк кесили қозғилип өлүп кәткән болса, йәнә бир сенегаллиқ йаймикәш һүсәйин мабийаму җүмә күнидики намайишта өлгәниди.
испанийә таратқулири сақчиларниң һүсәйин мабийаниң өлүми билән һечқандақ мунасивити йоқлиқини илгири сүргән болса, хәлқара таратқулири һүсәйин мабийаниң сақчиларниң оқида өлүп кәткәнликини билдүрмәктә.
нәқ мәйданни көргүчиләр болса мамә мабийабә нидийабәниң сақчиларниң тайиқи сәвәбидин йүрәк кесили қозғилип өлүп кәткәнликини илгири сүрмәктә.
пәйшәнбә күни вәқәдин кейин сенегал ташқи ишлар министири сиддиқ каба, испанийәниң дакар әлчиси алберто виреллани ташқи ишлар министирлиқиға чақиртип ағзаки нота бәрди.
бу вәқәдин кейин пайтәхт мадридқа йиғилған йүзләрчә сенегаллиқ намайиш өткүзүп сақчилар билән тоқунушти. ипсанийә сақчилири намайишқа қатнашқан 10дәк сенегаллиқини тутқун қилди.
вәқәниң зорийип кетишигә қарита мадрид шәһәр башлиқи мануела кармена фирансийә зийаритини йерим йолда тохтитип испанийәгә қайтишқа мәҗбур болди.
испанийәдә тәхминән 64 миң сенегаллиқниң йашайдиғанлиқи билдүрүлмәктә.
