трампниң қарариға қарши өткүзүлгән намайишларда һазирғичә 231 пәләстинлик йариланди

түркийә авази радийоси хәвири: америкиниң қуддусни «исраилийәниң пайтәхти»сүпитидә етирап қилиш қарариға қарши намайиш өткүзүлгән шәрқий қуддус, ийордан дәрйасиниң ғәрбий қирғиқи вә ғәззә қатарлиқ районларда исраилийә хәвпсизлик хадимлири билән пәләстинликләр арисида чиққан тоқунушларда йариланған пәләстинликләрниң сани 231гә йәтти.

пәләстин қизилай җәмийитиниң билдүрүшичә, ишғалийәт астида туруватқан шәрқий қуддусниң салаһәддин кочисида 12, ийордан дәрйасиниң ғәрбий қирғиқидики рамаллаһ, бәйтуллаһим, тулкәрим вә наблус шәһәрлири билән исраилийәниң муһасири астидики ғәззәдә 219 пәләстинлик йариланған.

исраилийә армийәси тәрипидин елан қилинған байанатта болса ийордан дәрйасиниң ғәрбий қирғиқи вә ғәззә чеграсида исраилийә хәвпсизлик хадимлири билән пәләстинликләр арисида 20 җайда тоқунуш чиққанлиқи билдүрүлди.

ийордан дәрйасиниң ғәрбий қирғиқида 600дәк пәләстинликниң исраилийә әскәрлиригә таш етип, аптомобил чақлирини көйдүрүп ташлиғанлиқи әскәртилгән байанатта, ғәззә чеграсидики тоқунушларда исраилийә әскәрлири билән тәхминән 450пәләстинлик арисида вәқә чиққанлиқи қәйт қилинди.

исраилийә сақчи даирилириниң шәрқий қудудуста йүз бәргән вәқәләр тоғрулуқ бәргән байанатида, 13 пәләстинликниң назарәт астиға елинғанлиқи, 4 исраилийә сақчисиниң йиник йариланғанлиқи билдүрүлди.