فیفانین ان یاخشیلار گئجه‌سینده ایران آچیقلاماسی
فیفا باشقانی جیانی اینفانتینو، ایران‌لی مقاملارین، قادین طرفدارلارین کیشی اویونلارین‌دا ایستادیوملارا گیرمه‌سی قونوسوندا ضمانت وئردیگینی پایلاشدی
فیفا طرفین‌دن ۲۰۱۹ ایلینین ان یاخشیلارینین معینلشدیگی گئجه، ایتالیانین میلان شهرین‌ده‌کی لا سکالا تاتریندا گئچیریلدی.
فرانس فوتبال درگیسی ایله ۲۰۱۰دان اعتباراً یئریدیلن اورتاقلیغین باشا چاتماسیندان سونرا حیاتا گئچیریله‌ن فیفانین ان یاخشیلار اؤدوللاری، ۴.جو دفعه وئریلدی.
میللی تیملرین باش مشق‌چی و کاپیتانلاری، مطبوعات نماینده‌لری آراسین‌دان سئچیلمیش بیر قروپ ایله خالقین ایشتیراکی ایله گئچیریله‌ن سس‌وئرمه سونوجوندا بارسلونادان لیونل مسی، ایلین ان یاخشی کیشی فوتبال‌چیسی سئچیلدی.
فرانس فوتبال درگیسینین وئردیگی بالون دور (قیزیل توپ) اؤدولونو ۵ دفعه آلان آرژانتینلی فوتبالچی، لیوئرپول‌دان ویرجیل فن دایک و یونتوس‌دان کریستیانو رونالدونو گئری‌ده قویاراق بو اؤدولو ایلک دفعه قازانماغی باجاردی.
ان یاخشی قادین فوتبالچی اؤدولونو، رین کلوبو و آمریکا میللی تیمینین هوجوم اویونچوسو مگان راپینو آلدی.
ان یاخشی کیشی و قادین فوتبالچی اؤدوللرینی تقدیم ائتمک اوچون صحنه‌یه گلن فیفا باشقانی جیانی اینفانتینو، ایران‌لی مقاملارین، قادین طرفدارلارین کیشی اویونلارین‌دا ایستادیوملارا گیرمه‌سی قونوسوندا ضمانت وئردیگینی پایلاشدی.
قادینلارین ایستادیوما گیرمه‌سی ایلک اولاراق ایران میللی تیمینین اکتبرون ۱۰وندا کامبوجو قوناق ائدجگی ۲۰۲۲ فیفا دونیا کاپی آسییا اله‌مه‌لری اویونو‌دا حیاتا گئچه‌جک.
اینگیلیس کلوبو لیوئرپولون باشیندا یوفا شامپیونلار لیگی کاپینی قازانان آلمان یورگن کلوپ، جوسپ گواردیولا (منچستر سیتی) و مائوریسیو پوچتینونون (تاتنهام) اؤنونده کیشی فوتبالین‌دا ایلین مربیسی سئچیلدی.
لیوئرپول‌دان برزیللی الیسون بیکر، ایلین کیشی قاپی‌چی‌سی، آتلتیکو مادریدده اوینایان هلندیلی ساری فان وینندال دا ایلین قادین قاپی‌چی‌سی اؤدولونه لایق گؤرولدو.
فیفا فیر پلی اؤدولونو، اینگیلتره شامپیون‌شیپ تیمی لیدز یونایتدین مربیسی مارچلو بیلسا قازاندی.
آرژانتینلی مربی، ۱-۱ بیتن اویون‌دا، تیمینین آستون ویلالی بیر فوتبالچی مصدوم اولدوغو سیرادا گل وورماسی سببیله اویون‌چولارینا بیله‌رک گل یئمه‌سی اوچون گؤستریش وئرمیشدی.
فیفا طرفدار اؤدولو ایسه اوتیستیک و گؤرمه انگل‌لی اوغلونو پالمیراس کلوبونون اویونلارینا آپاراراق، قارشیلاشما بویو میداندا اولانلاری اونا آنلادان برزیللی سیلوییا گریکویا وئریلدی.
