تراختور، انزلی‌ده تحقیر و توهینله قارشیلاندی
گلسوز بیتن اویونا ان چوخ ملوان طرفدارلارینین تورکلره و تراختورون آذربایجانلی طرفدارلارینا قارشی وئردیکلری نزاکت و اخلاق دیشی شعارلار دامغاسینی ووردو
203825
تبریزین تراختور تاخیمی اوست لیگین اون سککیزینجی هفته قارشیلاشمالاری چرچیوه‌سینده انزلی‌نین ملوان تاخیمینا قوناق اولدو. گلسوز بیتن اویونا ان چوخ ملوان طرفدارلارینین تورکلره و تراختورون آذربایجانلی طرفدارلارینا قارشی وئردیکلری نزاکت و اخلاق دیشی شعارلار دامغاسینی ووردو. تراختورون باش مشقچیسی رسول خطیبی اویون سونراسی، "وئریلن توهین دولو و اخلاق دیشی شعارلار اوچون انضباطی کمیته‌نین قرارینی گؤزله‌ییریک" دئدی.
اویون بیتدیکدن سونرا سوسیال شبکه‌لرده یاییملانان تحقیر ائدیجی شعارلار بیر چوخ تورک استفاده‌چی طرفیندن تپکی ایله قارشیلاندی. ملوان یئتکی‌لی‌لری طرفیندن استادیوما گیریشلرین پولسوز اولدوغو اعلان ائدیلدیگیندن 10 مینه یاخین طرفدارین بو مسابقه‌نی ایزله‌دیگی بیلدیریلدی.
تراختور بو سونوجلا 32 پوئنده و جدولین اوچونجو سیراسیندادیر.
