اردوغان، کابینه توپلانتیسی سونراسی دانیشدی

جمهورباشقانی رجب طیب اردوغان، ۲۱ ایللیک اقتدارلاری دؤنمینده، وطنداشلارین هامیسینا هر ساحه‌ده رفاهلارینی یوکسلده‌جک بیر آلت یاپی قوردوقلارینی ایفاده ائتدی.
جمهورباشقانی اردوغان، دونن باشکند آنکارادا جمهورباشقانلیغی ساراییندا‌کی کابینه ییغینجاغینین آردیندان آچیقلامالار وئردی.
اؤلکه‌نین قارشیسیندا آچیلان تاریخی فورصت پنجره‌سینی سونونا قدر آچماقدا قرارلی اولدوقلارینی وورغولایان اردوغان،
"حکومت اولاراق قوتلو یوروشه خیدمت ائد‌جک انرژی و اینانجا صاحیبیک. دؤولت اولاراق آلت یاپی و پتانسیله آرتیغییلا صاحیبیک" دئدی.
(اقتدارلاری دؤنمینده) اؤلکه‌نین ان بؤیوک قالخینما و دموکراسی آتیلیملارینا ایمضا  آتدیقلارینی، هر ایل اورتالاما یوزده ۵،۵ بؤیوده‌رک میللی گلیری ۱ تریلیون سرحدینه گتیردیکلرینی ایفاده ائد‌ن اردوغان،
"استخدام ۳۲ میلیون نفره چیخاردیغیمیز بیر تورکیه وار. وصایتدن ترورا، چئوریلیشدن اقتصادی توزاقلارا قدر قارشیلاشدیغیمیز پروبلئملری سایمیرام بئله. وطنداشلاریمیزین هامیسینا هر ساحه‌ده رفاهلارینی یوکسلده‌جک بیر آلت یاپی قوردوق" شکلینده دانیشدی.
اردوغان، مجلیسین آچیلماسییلا بیرلیک‌ده داها اؤزگورلوکچو یئنی بیر آنایاسا چالیشمالارینا باشلایاجاقلارینی دا وورغولادی.
"جولای آیی صادرات رقملری، سرعتین آرتاراق سوردوگونو گؤستریر" دئیه‌ن اردوغان،
"صادراتیمیز جولایدا ۲۰ میلیارد ۹۳ میلیون دلار اولدو. بو رقمله جولای آیین‌داکی ان یوکسک صادراتا چاتمیش اولدوق" شکلینده دانیشدی.
اورتا وعده‌لی پروگرامین ایش دونیاسی و مسلک نومایندلری ایله بیرلیک‌ده حاضرلانماق‌دا اولدوغونو ایفاده ائد‌ن جمهورباشقانی، سپتامبر آیی اعتیبارییلا بونو دویوراجاقلارینی سؤیله‌دی.