اردوغاندان آذربایجان دؤنوشو آچیقلامالار
"بو ارمنیستانلا ایلگیلی بیر پروبلئم دئییل. زنگهزور کوریدورو، ایرانلا باغلی بیر پروبلئم"
جمهورباشقانی رجب طیب اردوغان، ناتویا عضو اولماق ایستهیهن سوئدین مسئولیتلرینی یئرینه یئتیرمهسی لازیم اولدوغونو وورغولادی.
جمهورباشقانی اردوغان، قوزئی قیبریس تورک جمهوریتی و آذربایجان سفرلری دؤنوشونده اوچاقدا ژورنالیستلره دگرلندیرمهلر وئردی.
اردوغان، "تورکیه، سوئدین ناتویا عضولوگونه اونای وئرهجک می؟" سوالینی،
"بو یاخینلاردا ناتو باش کاتیبی ینس استولتنبرگ ایستانبولدا قوناغیم ایدی. اونا سؤیلهدیگیمیز شئی بو اولدو؛ 'اگر بیزیم سوئدین گؤزلنتیلرینه موطلق جاواب وئرمهمیزی گؤزلهییرسینیزسه، هر شئیدن اؤنجه سوئد بو ترور هؤرگوتونون (پکاکا) ائتدیکلرینی بیر دفعه یوخ ائتمهسی لازیم' تام او سیرادا تأسف کی، یئنه سوئدده تروریستلر جادهلرده گؤستری ائدیردیلر. ایندی بیز بو تابلو ایچینده بو ایشه مثبت باخابیلمهریک. بونو حل ائتمدیکدن سونرا ویلنیوسدا (تشکیل ائدیلهجک ناتو ذیروهسینده) فیلان بیز قالخیب دا 'ال ببهک گول ببهک' (هر شئی تامام) دئیه بیلمهریک" شکلینده جاوابلادی.
یئنی دؤنمده تورکیهنین خاریجی سیاستدهکی اؤنجهلیگینین دیالوگ و دیپلوماسی اولدوغونو سؤیلهیهن اردوغان، یونانیستان ایله ایلیشکیلری ده دگرلندیردی.
اردوغان،
"تورکیهدهکی سئچیمدن سونرا یونانیستانین اؤنجهکی باشباخانی کیریاکوس میچوتاکیس منه تلفن ائتدی، تبریک ائتدی. بو سببدن بو آندا ویلنیوسدا بیز اونونلا گؤروشمکدن چکینمریک. ایکی قونشو اؤلکهییک. سؤیلهیهجگیمیز شئیلر بللی. ندیر او؟ 'بو سیلاحلانماغی بوراخین آرتیق. یعنی بو سلاحلانماقلا هارا چاتاجاقسینیز؟' هر حالدا بونلاری بیر دانیشاریق. بونو دا بیلین کی بیز دوشمنلریمیزی چوخالتماق اوچون دئییل، آزالتماق اوچون واریق. تورکیه بودور، اردوغان بودور" شکلینده دانیشدی.
قیبریس پروبلئمینه ده توخونان اردوغان،
"روم کسیمینده مؤوجود رهبرلیک اؤنجهکیلره مقایسهده داها باریش سئور بیر هاوانین ایچینده. اگر بو باریش سئور هاوانی داوام ائتدیرسهلر و باشدا آوروپا بیرلیگی اولماق اوزره بعضی تحریکلره قاپیلمادان قوزئی قیبریس تورک جمهوریتینین اگمن برابرلیکدهکی حاقلارینی قوروماغا 'اولور' دئسه بیز ده 'نیه اولماسین' دئیهریک. آوروپا بیرلیگی دوروست دئییل. بیز ده ۵۰ ایلی آشیرتدیق، هله بو آوروپا بیرلیگی عینی نقطهده. بو قونولاری ماسایا یاتیرداجاغیق. بیزیم ده بونو گؤزدن گئچیرمهمیز لازیمدیر" دئدی.
قافقازداکی گلیشمهلری ده دگرلندیرن اردوغان، باکی-ایروان خطینده باریش سورهجینین ایرلیلهمهسینین، تورکیهنین ارمنیستان ایله ایلیشکیلرینین نورماللاشماسینا اؤنملی فایدا وئرجگینی ایفاده ائتدی.
زنگهزور کوریدورونا باغلی ایران ایله یاشانان پروبلئمه توخونان جمهورباشقانی،
"بو ارمنیستانلا ایلگیلی بیر پروبلئم دئییل. زنگهزور کوریدورو، ایرانلا باغلی بیر پروبلئم. بورادا ایرانین بئله بیر (منفی) رفتار ایچینده اولماسی، ایستر آذربایجانی ایسترسه بیزی اوزور. بیر ده بورادا واگون باشینا آلینان اؤدنیشلر فیلان دا چوخ تأسف کی چوخ چوخ یوکسک. آرزو ائدرهم کی بو چتینلیگی ده قیسا زاماندا آشاریق. بونا (ایران طرفی) مثبت یاخینلاشمیش اولسالار بو گون هم قورو یولو هم دمیر یولویلا بورادا تورکیه-آذربایجان-ایران بیر بیریله قایناشمیش اولار و بلکه ده پکن-لندن خطی ده آچیلمیش اولار" ایفادهلرینی ایشلتدی.