میللی ساوونما باخانی فایننشال تایمزا موصاحیبه وئردی
"تۆرکیه‌سیز ناتو تصوور ائتمک مومکون دئییل. ۷۰ ایلدن بری بیز سینانمیش بیر میللتیک، سینانمیش بیر اوردویوق"
میللی ساوونما باخانی حولوصی آکار، تۆرکیه‌سیز بیر ناتونون تصوور بئله ائدیلممه‌یه‌جگینی بیلدیردی.
حولوصی آکار، اینگیلتره‌نین مشهور قزئتلرین‌دن بیری اولان فایننشال تایمزا موصاحیبه وئردی.
تۆرکیه‌نین ناتو ایچینده‌کی قونومونا توخونان آکار:
"تۆرکیه‌سیز ناتو تصوور ائتمک مومکون دئییل. ۷۰ ایلدن بری بیز سینانمیش بیر میللتیک، سینانمیش بیر اوردویوق. بو گونه کیمی بیز اتعهدلاریمیزا، بو اتفاقلارا ضد هئچ بیر وضعیت ایچینده اولمادیق و اولمایاجاغیق دا" ایفاده‌سینی ایشلتدی.
ناتونون گئنیشله‌مه‌سینه قارشی اولمادیقلارینی، سوئد و فنلانیدن عضولوک ایستکلرینی آنلادیقلارینی آنجاق اونلارین دا تۆرکیه‌نین تهلوکه‌سیزلیک قایغیلارینی آنلامالارینی ایسته‌دیکلرینی ایفاده ائد‌ن آکار، سؤزوگئدن ایکی اؤلکه‌نی تعهدلارینی یئرینه یئتیرمه‌یه چاغیردی.
آکار اوکراینادا ساواشین داوام ائتدیگی بیر واخت‌دا تۆرکیه‌نین اتفاقا قاتقیلارینین داها چوخ اؤنم قازاندیغینی، تۆرک سلاحلی گوجلرینین گوجولو اولماسینین ناتونون گوجلو اولماسی دئمک اولاجاغینی قید ائتدی.
تۆرکیه‌نین هم اوکراینا، هم ده روسیا ایله دانیشیقلار آپارابیله‌ن تک اؤلکه اولدوغونو بیلدیره‌ن آکار، روسیا و اوکراینا ایله تاخیل گؤروشمه‌لری سیراسیندا آپاردیقلاری دانیشیقلارین باریش دانیشیقلاری اوچون ده مدل اولابیله‌جیگینی قید ائدرک، ایکی اؤلکه آراسین‌دا واخت ایتیرمه‌دن آتیشکس چاغریسی ائتدی.
سوریه‌ده محتمل بیر قورو عملیاتی ایله باغلی حولوصی آکار،
"بیز بو گونه قدر اؤلکه‌میزین و میللتیمیزین، سرحدلریمیزین تهلوکه‌سیزلیگی اوچون لازیم اولان عملیاتلاری حیاتا گئچیردیک و لازیم بیلدیگیمیز زامان یئنه ده ائدجییک" دئدی.
تۆرکیه‌نین گونئیینده ترور دهلیزینین یارادیلماسینا ایجازه وئرمه‌یه‌جکلرینی وورغولایان میللی ساوونما باخانی، آمریکا بیرلشمیش دؤولتلرینین سوریه‌ده‌کی بؤلوجو ترور هؤرگوتو پ‌کاکانین قولو ی‌پ‌گ ایله امکداشلیغا سون قویماسی چاغریسینی یئنه‌له‌دی.
