اوکراینالی ۳۴ کیمسه‌سیز اوشاق تورکیه‌یه گتیریلدی
اوکراینانین اود‌سا شهرین‌ه‌کی سونچکو اوشاق ائوین‌دن ۳۴ کیمسه‌سیز اوشاق باشکند آنکارایا گتیریلدی
۳۴ یتیم و اؤکسوز اوکراینالی اوشاق اوکراینادان تورکیه‌یه گتیریلدی.
جمهورباشقانی رجب طیب اردوغانین حیات یولداشی امینه اردوغان، ۲ اکتبردا ایستانبول‌دا وحیدالدین ساراییندا قوناق ائتدیگی اوکراینا درولت باشقانی ولودیمیر زلنسکینین حیات یولداشی اولنا زلنسکا ایله ساواشدان ائتکیلنن قادین و اوشاقلارین وضعیتینی دانیشمیش،
"تورکیه پروسه‌نین باشیندا اولدوغو کیمی باریشین قورولماسی اوچون بوتون ساحه‌لرده دیپلوماتیک چابالارینی داوام ائتدیره‌جک" دئمیشدی.
زلنسکا ایسه تورکیه‌نین عائله‌سیز ۱۳۰۰ اوکراینالی اوشاغی قبول ائتمه‌سیندن ممنونلوغونو ایفاده ائد‌رک، اؤزل قایغییا احتیاجی اولان تخمیناً ۲۰۰ اوشاغین تورکیه‌یه گتیریلمه‌سی اوچون امینه اردوغان‌دان کؤمک ایسته‌میشدی.
زلنسکانین کؤمک ایسته‌مه‌سی ایله باغلی ایلک آددیم گؤروشمه‌دن تخمیناً ۲ آی سونرا آتیلدی.
اوکراینانین اود‌سا شهرین‌ه‌کی سونچکو اوشاق ائوین‌دن ۳۴ کیمسه‌سیز اوشاق باشکند آنکارایا گتیریلدی.
ان کیچیی ۱۰ آیلیق اولان اوشاقلارین روحی باخیم سۆره‌جی ساغلیق کنترللاریندان سونرا باشلادیلدی.
اولنا زلنسکا توییتر حسابیندان ائتدیگی پایلاشیمدا:
"اوشاقلارین گوونلیگی بیزیم بیرینجی اؤنجه‌لیگیمیزدیر" ایفاده‌سینی ایشلتدی و اوشاقلارین تخلیه‌سینین لیدئرلرین حیات یولداشلاری ایله امکداشلیغین اؤنملی اؤرنگی اولدوغونو بیلدیردی.
