۳ میلیون دوز آشی ایستانبولا گتیریلیر
واکسنلرین یارین ایستانبول هاوا لیمانینا گتیریلهجگی بیلدیریلدی
چیندن سیفاریش ائدیلهن یئنی تیپ کوروناویروس (کووید-۱۹) آشیسینین ۳ میلیون دوز اولان ایلک بؤلومو صاباح پکن-ایستانبول اوچوشو ایله تورکیهیه گتیریلهجک.
تورک هاوا یوللارینین مطبوعات خیدمتیندن وئریلن آچیقلامادا واکسنلرین یارین ایستانبول هاوا لیمانینا گتیریلهجگی بیلدیریلدی.
آچیقلامادا، ۷ کانتینردن عبارت ۳ میلیون دوز آشینی گتیرهجک اوچاق صاباح تورکیه ساعاتییلا ۰۶.۱۰دا ایستانبولا چاتاجاق. آشیلارین داها سونرا تورک هاوا یوللارینین باشقا بیر اوچوشو ایله آنکارایا گؤندریلمهسی پلانلاشدیریلیر. فوریه آیینا قدر گتیریلهجک آشی ساییسی ۵۰ میلیونا چاتاجاق.
ساغلیق باخانی فخرالدین قوجا بازار آخشامی وئردیگی آچیقلامادا پکنده گؤمروکده گؤرولن کووید-۱۹ اولقوسو سببیله ایشلرین موقتی اولاراق دوردورولدوغونو، بو سببله آشیلارین تورکیهیه چاتدیریلماسینین بیر-ایکی گون تخیره سالیندیغینی بیلدیریرکهن، پرزیدنت رجب طیب اردوغان دوننکی باخانلار قورولو توپلانتیسیندان سونرا وئردیگی آچیقلامادا چیندن ساتین آلینان آشیلارین ایلک بؤلومونو ایل باشیندان قاباق اؤلکهده اولماسینین گؤزلندیگینی بیلدیردی.