اردوغان عملیاتی سونلاندیرمانین شرطینی آچیقلادی
"بیز میللتیمیزله بیرلیکده مباریزه بایراغینی یوکسلتدیک، یا ایستیقلال یا اؤلوم دئیهرک"
جمهورباشقانی رجب طیب اردوغان، سوریهدهکی بوتون تروریستلرین سلاح بوراخیب تورکییهنین معینلشدیردیگی گوونلی بؤلگهنین دیشینا چیخماسی حالیندا، تورک سلاحلی گوجلرینین یئریتدیگی باریش بولاغی عملیاتینین بیتهجگینی آچیقلادی.
اردوغان، پارلماندا باشقانی اولدوغو عدالت و قالخینما پارتیسینین تورکییه بؤیوک میللت مجلیسیندهکی قروپ توپلانتیسیندا دانیشدی.
۸ ایلدیر داوام ائدن سوریه مسئلهسینین قوزئی آفریقا و اورتا دوغونون یئنیدن شکیللندیریلمهسی چاباسینین اۆرونو اولدوغونو قید ائدن اردوغان،
"داعشی دستکلهیهن مادی اولاراق یؤنلندیرهن اولکهلر بوگون قارشیمیزا داعش دوشمنی اولاراق چیخیر. مسئلهنین داعش دئییل هله پکاکا هئچ دئییل، سادهجه، بؤلگهمیزه دایر بیر پروژهنی حیاتا گئچیرمک اولدوغو چوخ آچیق" دئدی.
تورکییهنین، یا آوروپادا آمریکادا یازیلان سناریودا اؤزونه بیچیلن رولا تسلیم اولاجاغینی و یا مباریزه ائدجگینی بیلدیرهن اردوغان،
"تورکییهنین گئچمیشینده تسلیم اولما سئچهنهگی هئچ واخت اولمامیشدیر. بیز میللتیمیزله بیرلیکده مباریزه بایراغینی یوکسلتدیک. یا ایستیقلال یا اؤلوم دئیهرک. دؤولتینی قورموش بیر میللته ده باشقا بیر نتیجه یاراشمازدی" دئیه دانیشدی.
چیخیشیندا، باریش بولاغی عملیاتینا قارشی چیخان عرب لیگینی هدف آلان پرزیدنت، سوریه دیشینا چیخان ۶ میلیون سوریهلینین ۴ میلیونونون تورکییهیه گلدیگینی خاطیرلاداراق،
"تامامینا یاخینی عرب اولان بو سیغینماچیلار بیزه گلدی. ای عرب لیگی، سیز نه قدر سوریهلی قبول ائتدینیز. سیز سوریهنی عرب لیگیندن چیخاردینیز" دئیه دانیشدی.
تورکییهنین تاریخینین هئچ بیر دؤورونده مولکی وطنداش قیرغینی ائتمهدیگینی، باریش بولاغی عملیاتیندا دا بو یؤندهکی ادعالارین بؤهتان اولدوغونو قید ائدن اردوغان،
"بیزیم نه ایناجیمیز، نه مدنیتیمیز نه اخلاقیمیز بونا ایمکان وئریر" دئدی.
چیخیشیندا باتی اؤلکهلرینه ده سسلنن،
"هئچ واخت بئله بیر وضعیته دوشمهنیزی ایستهمهریک، اما اونو بیلین کی، یارین او بیری گون سیز ده بیزیمله عینی سیخینتیلارلا اوز اوزه قالاجاقسینیز. آرخایین اولون کی، او واخت بیزی چوخ یاخشی آنلایاجاقسینیز اما او زامان ایش ایشدهن گئچمیش اولاجاق. گؤرک، او زامان تروریستلری دستکلهیهنلره سیز نه دئیهجکسینیز نئجه داوراناجاقسینیز. گؤرک، تروریستلره بوگونکو کیمی صاحب چیخابیلهجک میسینیز؟ تروریستلر جانینیزی یاخماغا باشلایاندا یئنه بو نجیب میللت یانینیزدا اولاجاقدیر" دئین اردوغان سؤزلرینی، "بو مباریزهده (ترورلا) تورکییهنین قارشیسیندا دئییل یانیندا اولون، ان آزیندان قاریشمایین" دئیه سۆردوردو.
اردوغان سون اولاراق، سوریهدهکی بوتون تروریستلر ائله بو گئجه سلاح بوراخیب تورکییهنین اعلان ائتدیگی گوونلی بؤلگهنین دشینا چیخارسا، باریش بولاغی عملیاتینین دا سونا چاتاجاغینی اعلان ائتدی.
پرزیدنت اردوغان، قازئتهچیلرین منبج ایله باغلی سواللارینی جاوابلاندیرارکن ده،
"بیزیم دردیمیز، بو تورپاقلاری صاحبلرینه تسلیم ائتمکدیر. بیز بونو ایستهییریک. یوخسا، بیزه بونو وئرین دئیه بیر دردیمیز یوخدور. بیزیم تک دردیمیز وار، او دا بودور؛ ایستر روسیا ایستر رژیم، ترور هؤرگوتو یپگ/پیدنی بورادان چیخارمالیدیر" ایفادهلرینی ایشلتدی.
اردوغان، رژیمین، سدگ (یپگ/پکاکانین اؤرتو اولاراق ایستیفاده ائتدیگی آد سوریه دموکراتیک گوجلری) ایله هئچ بیر آنلاشماسی اولدوغونا دا احتیمال وئرمک ایستهمهدیگینی سؤیلهدی.
ایلگیلیلی خبرلر
ایستانبول هاوالیمانی یئنه ایلک سیرادا
آوروپا هاوا سیر و سفر گۆونلیگی تشکیلاتینین ۶-۱۲ می دؤونمینه باغلی آوروپا هاواچیلیق راپورو یاییملاندی