اردوغان: گوجلو ملتلر گوجلو عائله‌لردن اولوشور

جمهور باشقانی رجب طیب اردوغان، گوجلو ملت اولما یولونون گوجلو عائله‌لردن گئچدیینی سؤیله‌دی.

پرزیدنت اردوغان، بئش تپه ملت کنگره و مدنیت مرکزین‌ده ۷.جی عائله شوراسیندا دانیشدی.

چیخیشین‌دا، "عائله مفهومو اورتادان قالخمیش بیر توپلوم نه قدر زنگین اولورسا اولسون آیاق‌دا قالابیلمز" دئیه‌ن پرزیدنت اردوغان، عائله‌ده چؤزولمه اولارسا، ملت اولاراق وارلیغین تهلوکه‌یه دوشمه‌سینین قاچیلماز اولدوغونو دئدی.

اردوغان، نیکاح عقدینین دگرسیزلشدیریلدیگی، ائولی‌لیک دیشی ایلیشکیلرین نورمال ساییلدیغی، بوشانمانین تشویق ائدیلدیگی آجی‌لی بیر پروسه اولدوغونو وورغولادی.

"گوجلو ملتلر گوجلو عائله‌لردن اولوشور" دئیه‌ن اردوغان، جمعیتین آزالدیلماسی یولونداکی سیاستی ده دوغرو گؤرمه‌دیگینی سؤیله‌دی.

ریتینگ قایغی‌سی ایله حرکت ائد‌ن مئدیا اورگانلارینی، عائله قورومو ایله باغلی پروگراملار مسئله‌سین‌ده حساس اولماغا چاغیران اردوغان، عاغیللی جیهازلارین یایغینلاشدیغی گونوموزده آنا اتالارین اوشاقلاری ایله داها یاخین‌دان ایلگیلنمه‌لری لازیم اولدوغونو بیلدیردی.