ترامپی اردوغان قانع ائتدی

اسکی آمریکا بیرلشمیش دؤولتلری خاریجی ایشلر باخانینین یاردیمچیسی و امکلی ژنرال مارک کمیت، پرزیدنت رجب طیب اردوغانین سوریه قونوسون‌دا باشقان دونالد ترامپی قانع ائتدیگینی سؤیله‌دی. آوروپا و ناتودا ان بؤیوک اوردولاردان بیرینه صاحب اولان تورکیه‌نین واشنگتن اوچون حساس بیر اؤنمه صاحب اولدوغونو وورغولایان کمیت، بو باخیم‌دان ترامپین سوریه‌دن چکیلمه قرارینین "آنکارا ایله ایلیشکی‌لری اینکیشاف ائتدیرمه یولوندا اویغون بیر آددیم" اولدوغو دئیه بیلدیردی.

الجزیره تلویزیونوندا قاتیلدیغی بیر پروگرام‌دا دانیشان کمیت، "سانیرام پرزیدنت اردوغان، سوریه حاقین‌داکی بوتون پلانلارین‌دا باشقان ترامپین تورکیه ایله اوزون مدت‌لی ایلیشکیلری گؤز اؤنونده توتماسی اوچون راضی ائتدی" ایفاده‌سینی ایشلتدی.

تورکیه‌نین ۲۰۰۲.جی ایلده عراقا گیرمک ایسته‌یه‌ن آمریکا عسگرلرینه تورپاقلارینی آچماغی رد ائتمه‌سیندن بو یانا ایکی اؤلکه ایلیشکی‌لرین‌ده گئریله‌مه یاشاندیغینی بیلدیرن کمیت، بوندا واشنگتنون فتح‌الله‌چی ترور هؤرگوتو (فئتو) و یپگ‌یه اولان دستگینین ده تأثیرلی اولدوغونو سؤیله‌دی.

تورکیه‌نین بؤلگه‌ده بیر چوخ باخیم‌دان قیمت‌لی بیر آمریکا متفیقی اولماسینین حساس اؤنمده اولدوغونو وورغولایان کمیت، بونلاری قید ائتدی: "(تورکلر) بیر چوخ چاتیشمادا ایللردیر بیزیمله بیرلیک‌ده ساواشدی. آمریکانین نوکلئر سلاحلارینا ائو صاحب‌لیگی ائتدیلر. آمریکانین تورکیه ایله اولان ایلیشکی‌لری دیگر عنصورلارلا ایلیشکیلرینه مقایسه‌ده چوخ داها اؤنملی‌دیر. ترامپین بو (سوریه‌دن چکیلمه‌سی) سیاستینین چوخ عاغیللیجا اولدوغونو دوشونوره‌م. تورکیه، آمریکا اوچون اؤنم‌لی‌دیر. (سوریه‌دن چکیلمه) بو دا تورکیه‌نی گئری قازانماق اوچون یاخشی بیر آددیم‌دیر".

 سوریه‌نین قوزئیین‌ده‌کی ترور هؤرگوتو یپگ‌نین ترور هؤرگوتو پ‌کاکا ایله باغلانتی‌لی اولدوغونو اؤزلرینین ده قبول ائتدیگینی ایفاده ائد‌ن کمیت، آمریکانین بو هؤرگوته اولان دستگینین گئچیجی و تاکتیکی اولدوغونا وورغو ائتدی.

کمیت، "باشقان ترامپ بو آندا تام اولاراق بونا اویغون بیر قرار وئردی. بیز چکیلیریک. داعش آرتیق آمریکایا واراولوشسال بیر تهدید میدانا گتیرمیر. آچیق اولارساق مغلوب اولدو آنجاق یوخ ائدیلمه‌دی. تورکلر اولسون کوردلر اولسون یا دا روسلار اولسون بو ایشی باشقالارینا بوراخاق. داعشین یوخ ائدیلمه‌سی ندن آمریکانین مسئولیتین‌ده اولسون؟" دئیه دانیشدی.