اردوغان: تورکیه آمریکا ایله یاشانان بحرانی نئجه گؤرور؟ - مقاله
آمریکا طرفیندن تورکیهیه قارشی ائدیلهن تک طرفلی حرکتلر آمریکا ماراقلارینی بالتالایاجاق و تورکیهنی باشقا دوستلار و متفیقلر آختارماغا مجبور ائدجکدیر
تورکیه جمهوریتی پرزیدنتی سایین رجب طیب اردوغانین آمریکادا یایینلانان نیویورک تایمز قزئتینده ۱۰.۰۸.۲۰۱۸ تاریخینده اینگیلیزجه نشر اولونان مقالهسینین تورکجه ترجومهسیدیر.
آنکارا، تورکیه-تورکیه و آمریکا، سون ۶۰ ایلده استراتژیگ اورتاق و ناتو موتتفیقیدیر. اؤلکهلریمیز، سویوق ساواش دؤورونده و سونراسیندا اورتایا چیخان اورتاق چتینلیکلره قارشی چیین چیینه دورموشدور.
تورکیه، اؤتن ایللر عرضینده آمریکانین کمکه نه زامان احتیاجی اولدوسا ال اوزاتدی. کرهده عسگرلریمیز بیرلیکده قان تؤکدو. ۱۹۶۲دı، کندی یؤنتیمی، سووئتلرین کوباداکی موشکلرینی چکمهسینی، ایتالیا و تورکیهدهکی ژوپیتر موشکلرینی چکهرک تامین ائتدی. ۱۱ سپتامبر ترور سالدیریلارینین آردیندان، واشینگتون بو پیسلییه جاواب وئرمک اوچون دوستلارینا و موتتفیقلرینه گووندیی زامان، بیز سلاحلی قوهلریمیزی افغانیستانا، اوراداکی ناتو میسیونونون موفقیته چاتماسینا یاردیمچی اولماق اوچون گؤندردیک.
آنجاق، آمریکا، تورک خالقینین راحاتسیزلیغینی آنلاماقدا و بو راحاتسیزلیقلارا حؤرمت ائتمکده دفعهلرله و داواملی اولاراق اوغورسوز اولدو. و سون ایللرده ده اورتاقلیغیمیز، آنلاشمازلیقلارلا سیناندی. تأسف کی، بو تهلوکهلی گئدیش ترسینه دؤندرمک اوچون گؤستردییمیز سعیلر نتیجهسیز قالدی. آمریکا، تورکیهنین اگمنلیینه حؤرمت ائتمهیه باشلاییب، میلتیمیزین قارشی قارشییا اولدوغو تهلوکهلری درک ائتدیینی ثبوت ائدهبیلمزسه اورتاقلیغیمیز ریسکه گیرهبیلر.
۱۵ ژوئیه ۲۰۱۶دا، تورکیه، حکومتیم طرفیندن رسمی اولاراق فئتؤ کیمی تانیملانان، چته باشی فتح الله گولنین پنسیلوانیا اطرافینده بیر یئرلشکهدن ایداره ائتدیی قارانلیق بیر قروپون نمایندهلرینین سالدیریسینا معروض قالدی. فئتؤ نمایندهلری، حکومتیمه قارشی قانلی بیر دؤولت چئوریلیشینه جهد گؤستردیلر. او گئجه، میلیونلارلا ساده وطنداش، عینیله پرل هاربر و ۱۱ سپتامبر سالدیریلارینین آردیندان آمریکا خالقینین هئچ شوبههسیز یاشادیغی کیمی، وطنه باغلیلیق حسی ایله کوچهلره تؤکولدو. اوزون زاماندیر منیم سئچیم کامپانییامی ایداره ائدن سئوگیلی دوستوم اراول اولچوک و اوغلو عبدالله طیب اولچوکون دا آرالاریندا اولدوغو ۲۵۱ گوناهسیز اینسان، اؤلکهمیزین آزادلیغی اوچون ان آغیر بدلی اؤدهدی. اگر منیم و عائلهمین ایزینده اولان اؤلوم چتهسی اوغورلو اولسایدی، من ده اونلاردان بیری اولاردیم.
تورک خالقی، آمریکادان بو سالدیرینی کسین بیر دیلله پیسلهمهسینی و تورکیهنین سئچیلمیش لیدئرلیگی ایله دایانیشما ایچینده اولدوغونو ایفاده ائتمهسینی گؤزلهدی. آمریکا بونو ائتمهدی. آمریکا بو سالدیرییا قارشی وئردیی تپکی، قانع ائدیجیلیکدن چوخ اوزاقدی. تورک دموکراسیسینین یانیندا اولماق یئرینه، آمریکا رسمیلری احتیاطلی بیر شکیلده تورکیهده ثابتلیک، باریش و داواملیلیق چاغریسی وئردی. بو دا آزمیش کیمی، تورکیهنین ایکی طرفلی ائدیلهن آنلاشمایا اساساً، گولنین قایتاریلماسی اوچون وئردیی طلبده بو آنا قدر هئچ بیر ایرلیلییش قید ائدیلمهدی.
قارشیلیقلی ایلیشکیلرده باش وئرهن باشقا بیر خیال قیریقلیغینین قایناغی ایسه، آمریکا و سلاحلی ترور هؤرگوتو پکاکانین سوریه قولو پید/یپگ آراسیندا اورتاقلیقلا باغلی. پکاکا، ۱۹۸۴دن بو یانا مینلرله تورک وطنداشینین اؤلوموندن مسئول سلاحلی بیر ترور هؤرگوتودور و تورک مقاملارینین تخمینلرینه گؤره، واشینگتون سون ایللرده پید/یپگیه سلاح گؤندرمک اوچون ۵ مین کامیون و ۲ مین یوک اوچاغیندان ایستیفاده ائتدی.
حکومتیم، آمریکا مقاملارینین پکاکانین سوریهدهکی موتتفیقلرینه تعلیم و تجهیزات وئرمه قراریندان دویدوغوموز راحاتسیزلیغی، ایلگیلی مقاملارلا دفعهلرله پایلاشدی. تأسف کی، سؤزلریمیزه قولاق وئریلمهدی و آمریکا سلاحلاری ان نهایت وطنداشلاری و سوریه، عراق و تورکیهدهکی گوونلیک قوهلریمیزی هدف آلماق اوچون ایستیفاده ائدیلدی.
سون هفتهلر ایچینده، آمریکا، خاقیندا ترور هؤرگوتونه یاردیم ائتدیگی سوچلاماسی ایله جینایت ایشی آچیلان آمریکا وطنداشی اندریو برونسونون تورک پلیسی طرفیندن حبس اولونماسینی اساس گؤسترهرک، تورکیه ایله گریلیمی آرتیراجاق بیر چوخ آددیم آتدی. باشقان ترامپی بیر چوخ گؤروشوموز و صحبتیمیزده اویاردیغیم کیمی حقوقی پروسهیه حؤرمت ائتمک یئرینه، آمریکا دوست اؤلکهیه قارشی آچیق تهدید ائتدی و کابینهمین بیر نئچه عضوونه تحریم تطبیق ائتدی. بو قرار قبول ائدیلمز، منطیقسیز و ان نهایت اوزون مدتدیر داوام ائدن دوستلوغوموزا ضرر وئریجی ایدی.
تورکیه ایسه تهدیدلره، بیردن چوخ آمریکالی یئتکیلییه عینی شکیلده تجریم قراری آلاراق جاواب وئردی. آنجاق یئنه ده بیز همیشه عینی پرینسیپه صادق اولاجاییق: حکومتی حقوقی پروسهیه موداخیله ائتمهیه زورلامایا چالیشماق، آنایاسامیزا و یا اورتاق دموکراتیک دگرلریمیزه اویغون دئییل.
تورکیه، داها اول بیر چوخ دفعه ائتدیگی کیمی، آمریکا دینلهمهیی رد ائتدیگی تقدیرده، اؤز باشینا چاره قیلاجاقدیر. ۱۹۷۰لرده، واشینگتونون اعتراضلارینا باخمایاراق، تورک حکومتی، قیبریس روملاری طرفیندن تورکلره قارشی آپاریلان سویقیریمی انگللهمک اوچون حادثهلره موداخیله ائتدی. داها یاخین زامانلارا گلیندیگینده ایسه، واشینگتونون سوریهنین قوزئییندن گلن میلی گوونلیک تهدیدی ایله باغلی راحاتسیزلیقلاریمیزین جیدیلیگینی درک ائدیلمهسیندهکی اوغورسوزلوغو، داعشین ناتو سرحدلرینه گیریشینی کسن و یپگنی عفرین شهریندن چیخاران ایکی حربی عملیاتلا نتیجهلهندی. بو حاللاردا اولدوغو کیمی، میلی ماراقلاریمیزی قوروماق اوچون لازیم اولان آددیملاری آتاجاییق.
پیسلیگین دونیانین هر یئرینده حیلهگرجهسینه گزدیگی بیر واختدا، اون ایللردیر موتتفیقیمیز اولان آمریکانین تورکیهیه قارشی آپاردیغی تک طرفلی حرکتلر، یالنیز آمریکانین ماراقلارینی و گوونلیگینی بالتالاماغا خیدمت ائدجکدیر. چوخ گئج اولمادان، واشینگتون ایلیشکیلریمیزین آسیمتریک اولابیلهجیینه دایر یانلیش فیکیردن واز گئچمهلی و تورکیهنین آلتئرناتیولره صاحب اولدوغو حقیقتینی قبول ائتمهلیدیر. بو تک طرفلیلیک و سایقیسیزلیق گئدیشینی عکسینه چئویرمکده اوغورسوز اولونماسی، یئنی دوست و موتتفیقلر آختارماغا باشلامامیز ضرورتینی دوغوراجاقدیر.
ایلگیلیلی خبرلر
پکاکالی ۵ تروریست ضررسیزلشدیریلدی
"ان سون تروریست ضررسیز حالا گتیریلنه قدر عملیاتلاریمیز داوام ائدجک"