اردوغان، پوتین و روحانی ایله گؤروشجک
اوچلو ذیروهنین ایکینجیسینین، آوریل آیی اولینده تورکیهده گئچیریلمهسی پلانلانیر
خاریجی ایشلر باخانلیغی سؤزچوسو حامی آکسوی، تورکیه ایله آمریکا آراسیندا یارادیلاجاق مکانیزم چرچیوهسینده ۳ چالیشما قروپو اولوشدورولاجاغینی آچیقلادی.
حامی آکسوی، آمریکا خاریجی ایشلر باخانی رکس تیلرسونون گئچن هفتهکی آنکارا سفرینده یارادیلماسی قرارا آلینان "نتیجه یؤنوملو مکانیزمه" دایر معلومات وئردی.
آکسوی، اورتاق مکانیزم چالیشمالارینین خاریجی ایشلر باخانی مؤولود چاووشاوغلو و آمریکا خاریجی ایشلر باخانی رکس تیلرسونون ایشتیراکی ایله، آنکارا و یا واشینگتوندا باشلایاجاغینی سؤیلهدی.
مکانیزم چرچیوهسینده اوچ آیری چالیشما قروپونون یارادیلاجاغینی بیلدیرن آکسوی،
"ان قیسا مدتده قروپلار ایشلهمهیه باشلایاجاق، نتیجهلرینی گؤرمهیه باشلایاجاییق. ایلک گؤروشمهلر خاریجی ایشلر باخانلارینین باشقانلیغی آلتیندا توپلاناجاق" دئدی.
آکسویون وئردیگی معلوماتا گؤره، ایلک چالیشما قروپو فئتؤ و کونسوللوق مسئلهلرینی مذاکیره ائدجک. بو قروپدا ایکی اؤلکهده توتوقلو و یا محکوم اولونموش شخصلرین وضعیتلری مذاکیره اولوناجاق.
ایکینجی چالیشما قروپو ایسه سوریهدهکی تروریست قروپلارین مغلوبیته اوغرادیلماسی اوچون ایکی اؤلکهنین امکداشلیغینی مذاکیره ائدجک. آکسوی، حاضردا بؤلوجو ترور هؤرگوتو پکاکانین سوریه قولو ی.پ.گ کنترلوندا اولان منبیج مسئلهسینین بو چالیشما قروپوندا مذاکیره اولوناجاغینی بیلدیردی.
آکسوی، اوچونجو چالیشما قروپونون ایسه بؤلوجو ترور هؤرگوتو پکاکا ایله مباریزه مسئلهسینی موذاکیره ائدجیینی بیلدیردی.
سؤزچوسو،
"بیز بو چالیشما قروپلارینی کسینلیکله بیر گئچیشدیرمه کیمی گؤرموروک، معین بیر تقویم ایچریسینده بورادان بیر نتیجه چیخماسینی گؤزلهییریک" دئیه دانیشدی.
آکسوی، "تیلرسون آنکارا سفرینده پکاکا-پ.ی.د ایلیشکیسینی قبول ائتدی می" سوالینا "پکاکانین پ.ی.د/ی.پ.گ ایله ایلیشکیسی، تکجه بیزیم طرفیمیزدن دئییل، آمریکادا بیر چوخ شخص و قوروم طرفیندن دیله گتیریلمیشدیر" دئیه جاواب وئردی.
سؤزچو آکسوی، جمهورباشقانی اردوغان، روسیا پرزیدنتی ولادیمیر پوتین و ایران پرزیدنتی حسن روحانینین ۲۲ نوامبردا سوچیده گئچیردیکلری سوریه قونوسوندا اوچلو ذیروهنین ایکینجیسینین، آوریل آیی اولینده تورکیهده گئچیریلمهسینین نظرده توتولدوغونو، بو ذیروهدن اول ده اوچ اؤلکهنین خاریجی ایشلر باخانلارینین مارسین ۱۶سیندا آستانادا بیر آرایا گلهجیینی بیلدیردی.
ایلگیلیلی خبرلر
هاکان فیدان بیرلشمیش عرب امیرلیکلرینه سفر ائدهجک
خاریجی ایشلر ناظری هاکان فیدان بیرلشمیش عرب امیرلیکلرینه رسمی سفر ائدهجک.