آلمانیانین قالماقاللی قرارلارینا داها بیر یئنی‌سی علاوه اولوندو

خاریجی ایشلر ناظیری مولود چاووش اوغلونون هامبورگ شهرینده چیخیش ائدجگی سالون یانغینا قارشی کیفایت سویه‌ده قوروما اولمادیغینا گؤره دییشدیریلدی.  

هامبورگ شهری میته بلدیه سیندن آدی آچیقلانمایان بیر سؤزجو مطبوعاتا وئردیگی بیاناتدا دییشیک‌لیگه گوونلیک سبب‌لرینی گؤستردی و سالوندا یانغین خبردارلیق سیستمی‌نین اولمادیغینی، یئنی امره قدر سالون‌دان ایستیفاده ائدیله‌بیلمه‌یه‌جگینی بیلدیردی.  

دیگر طرف‌دن چاووش اوغلونون چیخیش ائتمه‌سی اوچون باشقا سالون‌دان ایستیفاده ائدیله جگی، آنجاق بونون بوگون آچیقلاناجاغی قئید ائدیلدی.  

داها اول ده بادئن-ورتنبرگ ایالتینین گاگئنائو شهرینده عدالت ناظیری بکیر بوزداغین جمعه آخشامی گونو چیخیش ائدجگی تدبیر ده "اتومبیل دایاناجاغی و گیریش‌لرین کیفایت‌لی اولمادیغی” ایره‌لی سوروله‌رک لغو ائدیلمیشدی.

ایقتیصادیات ناظیری نیهاد زیبکچی‌نین ده بازار گونو کلن شهرینده چیخیش ائدجگی تدبیر ده سالون‌دان ایستیفاده ائدن شیرکت طرفین‌دن لغو ائدیلدیگی بیلدیریلمیش، آنجاق تدبیر باشقا سالوندا کئچیریلمیشدی.