اردوغان: ولادیمیر پوتین ایله حلب موضوعسوندا بیر گؤروشمه ائدجگیک

تورکیه پرزیدنتی رجب طیب اردوغان، روسیا دولت باشقانی ولادیمیر پوتین ایله حلب موضوعسوندا بو گون آخشاما دوغرو بیر گؤروشمه ائدجگینی ایفاده ائده‌رک،

"خاریجی ایشلر ناظریمیز، میلی ایستیحبارات مستشاریمیز عینی شکیلده تعقیب ائدیر. هله تعقیب ائدیریک بیر نتیجه آلیریق اومیدی ایله. ساحه‌دکی وضعیت چوخ کؤو‌رک و کومپلکس. نئجه کی داها الده ائدیلن راضیلاشمانین اوزرین‌دن ساعت‌لر کئچمه‌دن، رژیم گوجلری آتشکسی پوزوب یئنی‌دن وطنداش‌لارا سالدیردیما‌یا باشلادی. اونا گؤره تمکین‌لی حرکت ائدیریک" دئدی.

اردوغان، بئش تپه‌ده، 32. مختارلار توپلانتیسینداکی چیخیشیندا، مظلومون اومیدی اولان تورکیه‌نین حلب خالقینی تک قویمادیغینی و بوراخمایاجاغینی سؤیله‌یه‌رک،

"نه باهاسینا اولورسا اولسون، تک بیر گوناهسیز جانی قورتارماق اوچون بئله الیمیزدن گله‌نی ائدجگیک. امین اولون کی، تورکیه‌نی الباب‌دان اوزاق توتماق اوچون اوغراشان‌لارلا، ترورلا موباریزه اصول‌لاریمیزی یونگوللتممیزی ایسته‌ین‌لرین نیت‌لری اورتاق‌دیر." ایفاده‌لرینی ایستیفاده ائتدی.

پرزیدنت اردوغان،

"حلب‌دن قورتولان قارداش‌لاریمیزا اینسانی یاردیم چاتدیرماق اوچون بوتون تدبیرلری آلدیق. ای بیرلشمیش میللت‌لر تشکیلاتی‌ هاراداسان؟ باخین هر جور دستگی وئرمه‌یه بیز حاضیریق، وئرجگیک اما بیر کوریدور، بونون اوچون تلاش ائدیریک. ایدلیب و اطرافینا گئده‌جک‌لری یانیندا تورکیه‌یه گله بیله‌جک اولان‌لار اوچون ده حاضیرلیق‌لاریمیز تامام. تورکیه‌یه می گله‌جک‌لر، اونلاری دا باغریمیزا باسماغا حاضیریق "شکلینده دانیشدی.

تورکیه‌نین تشببوسو و چوخ تلاشلاریله الده اولونان آتشکسین حیاتا کئچیریلمه‌سی‌نین حلبدکی گوناه‌سیزلار اوچون بلکه ده سون اومید اولدوغونو دیله گتیرن اردوغان،

"بو اوزدن ده بوتون طرف‌لری و بین الخالق جمعیتی بو آتشکسی رعایت ائتمه‌یه و دستک اولماغا دعوت ائدیرم. اینسانی دهلیز درحال، هئچ بیر مانع تؤرتمه و تخریبات اولما‌دان آچیلما‌لی و گوناه‌سیز اینسان‌لارین شرق حلب‌دن ساغ ساغ-سالامات چیخماسینا ایجازه وئریلمه‌لی‌دیر. اسد رژیمی آچیق شکیلده حلبده ساواش گوناهی، اینسان‌لیق گوناهی ایشلییر. بو گئرچگی، اونا دستک وئرن‌لر داخیل آرتیق هر کسین گؤرمه‌سی لازیم‌دیر. " دئدی.