بینالی ییلدیریم "ت.ر.ت"ده گوندمی دیرلندیردی
باش ناظیر بینالی ییلدیریم چئوریلیش جهدی ایله علاقهلی سوروشدورمالار پروسئسی بارهده معلومات وئردی.
باش ناظیر بینالی ییلدیریم فتحاللهچی ترور تشکیلاتی پارالل دؤولت یاپیلانماسینین (فئتو/پ.د.ی) چئوریلیش جهدی ایله علاقهلی سوروشدورمالار چرچیوهسینده آرالاریندا پولیس، عسگر و محکمه منصوبلاری، ایجرا حاکمیتینین نمایندهلری ایله سیویل وطنداشلارین اولدوغو 40 مین 29 نفرین ساخلانیلدیغینی سؤیلهدی.
باش ناظیر ییلدیریم ت.ر.ت-ده ایشتیراک ائتدیگی اؤزل پروقرامدا سواللارا جاواب وئررکن، چئوریلیش جهدی چرچیوهسینده داوام ائتدیریلن سوروشدورمایا دایر معلومات وئرهرک دئدی کی، 5 مین 187 نفرین نظارت آلتینداکی ایشلری داوام ائدیر. 20 مین 355 نفر حبس ائدیلیب. دؤولت قوروملاریندا 79 مین 900 نفر وظیفهسیندن موقتی اوزاقلاشدیریلیب، 5 مین 14 نفر ایسه وظیفهسیندن آزاد ائدیلیب.
باش ناظیر یئنی قبول ائدیلن قانون قوهسیندکی قراردا یئر آلان نظارت آلتیندا اولماق شرطی ایله 38 مین محبوسون ائرکن سربست بوراخیلاجاغینی قئید ائتدی.
بونون عفو قراری اولمادیغینی وورغولایان باش ناظیر دئدی کی، بو تدبیر عفو دئییل 1 ژوئیهدن سونرا ایشلهنن سوچلارا شامیل ائدیلمهیهجک. دؤولته قارشی سوچ ایشلیینلر، ترورچولوقدا اتهام اولونانلار، شخصی حیاتا موداخیله ائتمهیه گؤره جزا آلانلار، قصدا آدام اؤلدورنلر و ... بو کیمی سوچلارا گؤره موحاکیمه اولونانلار و یا اولوناجاق شخصلر یئنی قرارلاردان فایدالانا بیلمهیهجکلر.
ایکینجی بیر چئوریلیش جهدی احتیمالینا قارشی لازیم اولان تدبیرلرین گؤرولدوگونو وورغولایان باش ناظیر ییلدیریم دئدی کی، صاباح بیر چئوریلیش جهدی اولاجاغی احتیمالیندن دانیشمیریق. بو چئوریلیش جهدینه سبب اولانلار، بو ترور تشکیلاتی ایله علاقهلری اولانلار هله تامامیله اورتایا چیخمایب و بونلار هله ده تهدید تشکیل ائدیرلر. بیز اساس بونلاری وورغولاییریق.
آمریکانین فئتونون قولدورباشی فتحالله گولهنین اؤلکهدن قاچماسینا مانع اولا بیلهجک تدبیرلر بارده کی آچیقلاماسی قارشیسیندا ایسه باش ناظیر بیلدیردی کی، هر حالدا بو، بیزیم موقتی حبس ائتمه طلبیمیزه جاواب اولاراق وئریلن بیر آچیقلامادیر. آمریکا نتیجهده اونون بیر گوناه ایشلدیگینی، دلیللرله ثبوتا یئتیریلمیش بیر ترور تشکیلاتینین باشچیسی اولدوغونو بیلیر. بو شرطلرده اونو مدافعه ائدهجک دئییلدیر. بو اؤلکه ده بیزیم کیمی حقوق دؤولتیدیر، لازیم گلنی یئرینه یئتیرهجکدیر. بونون عکسینی دوشونمک سهو اولار.
میلی ایستحبارات تشکیلاتلارینین یئنیدن دوزنلنمهسی مسئلهسینه ده توخونان باش ناظیر اؤلکه داخیلینده و خاریجینده اولماقلا ایکی آیری تشکیلاتین یارادیلاجاغینی وورغولادی.
وان شهرینده پولیس مرکزینه ترور تشکیلاتی پ.ک.ک طرفیندن ائدیلن ترور هوجومونا دا توخونان باش ناظیر دئدی کی، نه ائدرلرسه ائتسینلر، بیر قدر آجی چکهجیک، اما نتیجهده اونلارین دا حسابلارینی گؤره جیک. بو بارهده میللتیمیز آرخایین اولسون. نئجه فئتو تشکیلاتینی محو ائتدیک، بونلار دا محو ائدیلهجک. بو ایکی ترور تشکیلاتی آراسیندا علاقه اولدوغو ایسه سیرر دئییل.
تورکیهنین خاریجی سیاستینه ده توخونان باش ناظیر منبیچ مسئلهسینده سوریه عرب کوالیسیون آدییلا بیر تشکیلاتلانما اولدوغونو بیلدیرهرک دئدی کی، آمریکا بورادا هر هانسی بیر کورد یاشاییش منطقهسی قورولماسینا ایجازه وئریلمهیهجگینه دایر تعهدی وار و بونو یئرینه یئتیرهجکلرینی بیر داها دیله گتیردیلر. مسئلهنی یاخیندان ایزلهیریک.
ایلگیلیلی خبرلر
هاکان فیدان ناتو توپلانتیسینا قاتیلاجاق
هاکان فیدان ناتو غیری-رسمی خاریجی ایشلر ناظیرلری توپلانتیسینا قاتیلاجاق.