علییئو: مینسک قروپونون لغو ائدیلمه‌سینین زامانی گلدی
"آذربایجان، ایشغالا سون وئره‌رک تورپاق بوتونلوگونو و اگمنلیگینی تامین ائتدی. آرتیق ارمنیستان-آذربایجان ایختیلافی تاریخده قالدی"
آذربایجان جمهورباشقانی ایلهام علییئو، اؤلکه‌سی ایله ارمنیستان آراسینداکی ایختیلافین حلی اوچون قورولان آوروپا گوونلیک و امکداشلیق تشکیلاتی (آگیت) مینسک قروپونون لغو ائدیلمه‌سینین زامانینین گلدیگینی سؤیله‌دی.
ایلهام علییئو، گؤروشمه‌لر اوچون آذربایجانا گئدن آگیت دؤنم باشقانی و مالتا خاریجی ایشلر، آوروپا ایشلری و تیجارت باخانی ایان بورگو قبول ائتدی.
آذربایجان جمهورباشقانلیغیندان وئریلن آچیقلامایا گؤره، علییئو، قبولداکی دانیشماسیندا ارمنیستانلا یئریتدیکلری باریش مذاکیره‌لرینه باغلی، باریش اوچون تمل اصولون آذربایجان طرفیندن تکلیف ائدیلدیگینی، باریش آنلاشماسی متنینین ده آذربایجان طرفیندن حاضرلاناراق مذاکیره‌یه سونولدوغونو ایضاح ائتدی.
ایلهام علییئو، آذربایجان ایله ارمنیستان آراسینداکی ایختیلافین حلی مقصدی ایله یارادیلان آگیت مینسک قروپونون، پروبلئمین حلی اوچون هئچ بیر شئی ائتمه‌دیگینی ایفاده ائد‌رک بئله داوام ائتدی:
"آگیت مینسک قروپو باشقانلارینین ایللرجه یئریتدیگی موذاکیره سۆره‌جی آذربایجان تورپاقلارینین ایشغالینین داوام ائتدیریلمه‌سینه خیدمت ائتدی. آذربایجان، ایشغالا سون وئره‌رک تورپاق بوتونلوگونو و اگمنلیگینی تامین ائتدی. آرتیق ارمنیستان-آذربایجان ایختیلافی تاریخده قالدی. بو سببله آگیت مینسک قروپو و اونا باغلی بوتون قورولوشلارین لغو ائدیلمه‌سینین زامانی گلدی. آذربایجان بو قونونو گوند‌مه گتیردی. ارمنیستانین دا بونو قبول ائتمه‌مه‌سی اوچون هئچ بیر سبب یوخ".
آگیت مینسک قروپو، ارمنیستان-آذربایجان آنلاشمازلیغی و قاراباغ پروبلئمینین باریشچیل یوللارلا حل ائدیلمه‌سینی تشویق و طرفلر آراسیندا آراچیلیق ائتمک آماجییلا ۱۹۹۲ده قورولموشدو.
باشقانلیغینی روسیا، فرانسا و آمریکا بیرلشمیش دؤولتلرینین یئریتدیگی آگیت مینسک قروپو، آرادان گئچه‌ن ایللرده بیر چوخ گیریشیمه باخمایاراق پروبلئمین حلینه دایر ملموس نتیجه‌لر الده ائده‌بیلمه‌میشدی.
