چیندن قازاقیستانا 'قورشاق و یول' چاغریسی

چین، قازاقیستانا "قورشاق و یول"ون یئنی دالانینی بیرلیکده تیکمه چاغریسی ائتدی.
چین خاریجی ایشلر باخانلیغیندان وئریله‌ن آچیقلامایا گؤره، چین-قازاقیستان خاریجی ایشلر باخانلاری استراتژیک دیالوگونون ایلک ییغینجاغی باشکند پکنده گئرچکلشدیریلدی.
ییغینجاقدا دانیشان چین خاریجی ایشلر باخانی وانگ یی، ایکی اؤلکه‌نین تاریخی ایپک یولو گذرگاهینداکی دوغو-باتی تیجارتینی جانلاندیرماغی آماجلایان قورشاق و یول گیریشیمی چرچیوه‌سینده‌کی امکداشلیغین اؤنمینه ایشاره ائد‌رک، "یوکسک کیفیتلی، داوام ائتدیریله‌بیلیر و دیرنجلی بیر یئنی باغلانتی کوریدورونو بیرلیکده تیکک" ایفاده‌سینی ایشلتدی.
وانگ، ایکی اؤلکه ایلیشکیلرینین سون ایللرده گوجلو گلیشیم سرعتی یاخالادیغینینی، قونشو اؤلکه‌لر آراسیندا قارشیلیقلی گووه‌ن، دستک و دایانیشمانین یاخشی بیر نومونه‌سی حالینا گلدیگینی وورغولادی.
قازاقیستان باشباخان کؤمکچیسی و خاریجی ایشلر باخانی مراد نورتلئو ایسه قازاقیستانین خاریجی سیاستینده چین ایله ایلیشکیلری اؤنجه‌لیک اولاراق گؤردوگونو، بو اؤلکه ایله سیاسی گوونی، خالقلار آراسینداکی تعاملی و قارشیلیقلی فایدایا دایالی امکداشلیغی اینکیشاف ائتدیرمه‌یی، اولوسلارآراسی و بؤلگه‌سل مؤوضوعلاردا یاخین ائش‌گودومو تامین ائتمه‌یی ایسته‌دیکلرینی ایفاده ائتدی.
ییغینجاقدا طرفلر، قورشاق و یول امکداشلیغی، یئرلی بیریملر و خالقلار آراسینداکی تعاملو آرتیرما، خاریجی موداخیله‌لره و سیزما گیریشیملرینه قارشی اورتاق موباریزه، امنیت و گوونلیک ساحه‌سینده امکداشلیغی اینکیشاف ائتدیرمه، چین-اورتا آسیا دیالوگو، شانگهای امکداشلیق تشکیلاتی، آسیادا تعامل و گووه‌ن آرتیریجی تدبیرلر کنفرانسی و بیرلشمیش میللتلر کیمی چوخ طرفلی چرچیوه‌لرده امکداشلیغی گوجله‌ندیرمه قونوسوندا آنلاشمایا واردی.
قازاقیستان چینین آوراسیا ایله تیجارتی اوچون حیاتی بیر کوریدور اولان اورتا آسیا اؤلکه‌لری ایچینده حساس مؤقعیتده‌دیر.
چین دؤولت باشقانی شی جین‌پینگ، قورشاق و یول گیریشیمینی ایلک دفعه ۲۰۱۳ده قازاقیستانا ائتدیگی سفر‌ده دویورموشدو.