آذربایجاندان مکرونا تپکی
حاجیزاده: بو سورهجی آخسادان هر جور خاریجی موداخیله قرارلیلیقلا اؤنلهنهجک
آذربایجان خاریجی ایشلر باخانی سؤزچوسو آیخان حاجیزاده، فرانسا جمهورباشقانی امانوئل مکرونون آذربایجان تورپاغی لاچین دالانی حاقیندا "اینسانی کوریدور" ایفادهسینی ایستیفاده ائتمهسینه تپکی وئردی.
حاجیزاده، مکرونون ائلچیلر کنفرانسیندا دیله گتیردیگی آذربایجان قارشیدی گؤروشلره باغلی یازیلی آچیقلاما یاییملادی.
مکرونون بؤلگهدهکی مؤوجود وضعیته باغلی یانلیش ایزلهنیم اولوشدوران و تک طرفلی اولاراق ارمنیستانی ساوونان کینلی گؤروشلرینین باریش مدتینه ضرر وئردیگینی ایفاده ائدن حاجیزاده، بونلاری قید ائتدی:
تخمیناً ۳۰ ایلدیر ارمنیستان طرفیندن آذربایجانا قارشی گئرچکلشدیریلن ایشغال و سالدیری ائیلملرینی قینامایان، ایشغال نتیجهسینده تخمیناً ۱ میلیون کؤچکون و یئریندن ائدیلمیش وطنداشین اینسانی وضعیتینه باغلی هر هانسی بیر دگرلندیرمه وئرمهین فرانسانین، ایندی آذربایجانین بیرلشمیش میللتلر اساسنامهسینه و اولوسلارآراسی حقوقون نورم و قانونلارینا اویغون اولاراق تورپاقلارینین ایشغالدان قورتاریلماسییلا نتیجهلنهن ۴۴ گونلوک وطن محاربهسینی قیناماسی، عینی زاماندا مکرونون دانیشماسیندا بؤلگهده اینسانی وضعیتله باغلی ادعالارا یئر وئرمهسی آنلاشیلیر دئییل".
حاجیزاده، مکرونون آذربایجان تورپاغی لاچین کوریدورو حاقیندا "اینسانی کوریدور" ایفادهسیندن ایستیفاده ائتمهسینه تپکی وئرهرک، "فرانسا جمهورباشقانینین خیطابیندا 'لاچین اینسانی کوریدورو' کیمی ایفادهلره یئر وئرمهسی و باسقی دیلی ایله دانیشماسی قبول ائدیلمز. بو، آذربایجانین تورپاق بوتونلوگو و اگمنلیگینه حؤرمتسیزلیکدیر" دگرلندیرمهسینی وئردی.
آذربایجانین بؤلگهده باریش و گوونلیگین تامین ائدیلمهسینده قرارلی اولدوغونو وورغولایان حاجیزاده، "بو سورهجی آخسادان هر جور خاریجی موداخیله قرارلیلیقلا اؤنلهنهجک" ایفادهلرینی ایشلتدی.
مکرون، هفته ایچریسینده آذربایجان جمهورباشقانی ایلهام علییئو و ارمنیستان باشباخانی نیکول پاشینیانلا گؤروشهجگینی و ایختیلافین حلی اوچون یئنی دیپلوماتیک گیریشیم تکلیف ائدجگینی آچیقلامیشدی.
مکرون آیریجا آذربایجان اوزریندهکی باسقینی آرتیرماق اوچون اولوسلارآراسی ساحهده یئنی بیر دیپلوماتیک گیریشیم باشلاداجاغینی بیلدیرمیشدی.