اردوغان:"داها 50 ایل ایتیرمه‌یه هئچ کیم دؤزه بیلمز"
28 می ده کئچیریلن سئچکی‌لردن سونرا ایلک خاریجه سفرینی قوزیی قیبریس تورک جمهوریتینه گئدن تورکیه پرزیدنتی قیبریس-لی همکاری ارسین تاتار ایله بیرگه مطبوعات کنفرانسیندا چیخیشی زامانی دئییب.
جمهور باشقانی رجب طیب اردوغان تورکیه و قوزیی قیبریس تورک جمهوریتینین دوغو آغ دنیزینده اؤز حقوق لاریندان تام شکیلده ایستیفاده ائده‌جک‌لرینی تکرار ائتدی.
28 می ده کئچیریلن سئچکی‌لردن سونرا ایلک خاریجه سفرینی قوزیی قیبریس تورک جمهوریتینه گئدن تورکیه پرزیدنتی قیبریس-لی همکاری ارسین تاتار ایله بیرگه مطبوعات کنفرانسیندا چیخیشی زامانی دئییب: "تورکیه طرفی قیبریس مسئله‌سینده هر زامان یاپییجی و نتیجه یونلو موضع توتوب. قیبریس تورک‌لری هئچ واخت آزلیق اولماییب و اولمایا‌جاق. بو فاکت‌لارا محل قویمایان‌لار (یونان‌لار) آدانین تک حؤکمداری اولماق خیال‌لارینی داوام ائتدیریرلر. داها 50 ایل ایتیرمه‌یه هئچ کیم دؤزه بیلمز. اگر دانیشیق‌لار ماساسینا قاییدیش اولا‌جاقسا، بونون یگانه یولو قوزیی قیبریس تورک جمهوریتینی تانیماق‌دیر.
تورکیه قیبریس-ین دوغو آغ دنیزینده‌کی ماراق‌لارینی قوروماغا داوام ائده‌جک. ضامن اؤلکه کیمی بیز همیشه دیالوقا اوستونلوک وئرمیشیک. آدا‌داکی قارداش‌لاریمیزین امین-آمان‌لیغی و تهلوکه‌سیزلیگی بیزیم امین آمانلیغیمیز دئمک‌دیر.
تورکیه و قوزیی قیبریس تورک جمهوریتی-نین یونانیستانلا علاقه‌لره دایر یول خریطه‌سی باریش اوزرینده قورولوب. بو دنیزلرده باریش‌دان باشقا چاره یوخ‌دور. باریشین قارشی‌سینی آلماق ایسته‌ین‌لر اولسا، باشقا لاییحه حیاتا کئچیرمه‌لی اولاجاغیق. بیز یولوموزدا هئچ بیر مانعه ایستمیریک. قوی اگه دنیزی باریش دنیزی اولا‌راق دونیایا مئساژ گؤندرسین".
قوزیی قیبریس تورک جمهوریتی-نین پرزیدنتی ارسین تاتار دا اؤز چیخیشیندا اگمنلیک اساسیندا یونان‌لارلا امکداشلیغا حاضیر اولدوق‌لارینی بیل‌دیره‌رک "قیبری تورک خالقی هر زامان وطنی تورکیه ایله همفیکیردیر" دئییب.
