آذربایجان: فرانسا سناسیندا قبول ائدیلن قراری شدتله رد ائدیریک
فرانسا سناسینین قبول ائتدیگی قرارین آچیق تخریبات اولماقلا آذربایجان و ارمنیستان آراسیندا ایلیشکیلرین نورماللاشماسی پروسهسینی بالتالاماغا خیدمت ائتدیگی وورغولاندی
آذربایجان خاریجی ایشلر باخانلیغی فرانسا سناسینین "تحریم تکلیفی"نی قبول ائتمه قرارینی شدتله رد ائدرک، بو قرارین "آذربایجان و ارمنیستان آراسیندا ایلیشکیلرین نورماللاشماسی پروسهسینی بالتالاماغا خیدمت ائتدیگینی" بیلدیردی.
باخانلیقدان وئریلهن آچیقلامادا، فرانسا سناسینین قبول ائتدیگی و حقوقی باغلاییجیلیغی اولمایان قرارین، باریش پروسهسینه قاتقی وئرمک نیتینی بیان ائتمیش بیر اؤلکه اولاراق فرانسانین تک طرفلی سیاسی دوروشونو آچیقجا اورتایا قویدوغونا ایشاره ائدیلدی.
آچیقلامادا، فرانسا سناسینین قبول ائتدیگی قرارین "حقیقتدن اوزاق، یالانیش و بؤهتان اؤزللیگینده حؤکوملر عکس ائتدیردیگی، آچیق تخریبات اولماقلا آذربایجان و ارمنیستان آراسیندا ایلیشکیلرین نورماللاشماسی پروسهسینی بالتالاماغا خیدمت ائتدیگی" وورغولاندی.
قراردا شیشیردیلمیش ادعالارین اولدوغو و اونو حاضرلایانلارین بؤلگهدهکی تاریخی گئرچکلردن و مؤوجود وضعیتدن خبرسیز اولدوغو وورغولانان آچیقلامادا بو ایفادهلر یئر آلدی:
"فرانسا پارلمانینین اوست مجلیسینین قبول ائتدیگی قراردا ۳۰ ایله یاخین مدتده آذربایجان تورپاقلارینین ارمنیستان طرفیندن ایشغالیندان، دینج اهالییه قارشی قیرغینلاردان، شهر و کندلرین تالان ائدیلمهسیندن، ظولملردن بیر کز بئله بحث ائدیلمهمهسینی کدرله وورغولاییریق".
"فرانسا سناسینین قبول ائتدیگی قراری شدتله رد ائدیریک" ایفادهلرینه یئر وئریلن آچیقلامادا، سناسین بو قرارلا ارمنیستانداکی انتیقامچی قوهلری جسارتلندیردیگی، بؤلگهده باریشا، ثابتلیگه و ایرلیلهمهیه قاتقی وئرمهدیگی و قرارین آدیندا بحث ائدیلن "داوام ائتدیریلهبیلیر باریشین تشویقیندن اوزاق اولدوغو" وورغولاندی.