تورکیه ایله قیرغیزیستان آراسیندا موقاویله ایمضالانیب

صنایع و تکنولوژی ساحه‌سینده قارشی‌لیق‌لی علاقه‌لری اینکیشاف ائتدیرمک و درینلش‌دیرمک مقصدی ایله تورکیه ایله قیرغیزیستان آراسیندا موقاویله ایمضالانیب.

سؤزوگئدن موقاویله‌نی صنایع و تکنولوژی ناظیری مصطفی وارانک و قیرغیزیستانین انرژی و صنایع ناظیری دوسکول بیگ میرزایئو ایمضالاییب‌لار.

ناظیر وارانک پایتاخت آنکارادا ناظیرلیکده کئچیریلن گؤروش‌لرده آوقوست آییندا قیرغیزیستانین موستقیل‌لیگی‌نین 30 ایللیک یوبیلیی‌نین کئچیریلدیگینی خاطیرلادا‌راق، تورکیه-‌نین بو موستقیل‌لیگی تانییان ایلک اؤلکه اولدوغونو سؤیله‌ییب.

او واخت‌دان بری قیرغیزیستانلا علاقه‌لری گوجلندیرمک و قارشی‌لیق‌لی اقتصادی ماراق‌لاری آرتیرماق اوچون چالیشدیق‌لارینی ایفاده ائدن وارانک "اینانیرام کی، بو گون آپاریلان دانیشیق‌لار و ایمضا‌لارلا اینکیشافین اساسینی تشکیل ائدن صنایع و تکنولوژی ساحه‌سینده ایکی اؤلکه‌نی داها دا ایره‌لی آپاراجاغیق" دئییب.

سؤزوگئدن موقاویله ایله تیجاری و اقتصادی علاقه‌لرین گوجلنمه‌سینه ایمکان یاراتدیق‌لارینی ایفاده ائدن وارانک ایکی طرف‌لی تیجارت حجمی‌نین آرتیریلماسی ایستیقامتینده اهمیت‌لی بیر آددیم آتیلدیغینی وورغولاییب.

وارانک بو موقاویله‌نین داوامی اولا‌راق تورکیه-‌نین صنایع  تجروبه‌سینی قیرغیزیستانا داشیماق ایسته‌دیک‌لرینی ایفاده ائده‌رک، قیرغیزیستان-دا مرکزی صنایع بؤلگه‌سی قورماق اوچون ایشه باشلایا‌جاق‌لارینی سؤیله‌ییب.

قیرغیزیستانین انرژی و صنایع ناظیری دوسکول بیگ میرزایئو  ده تورکیه-‌نین تجروبه‌سیندن فایدالانماق اوچون تکنولوژی و بیلیک‌لری قیرغیزیستانا اؤتوره‌جک مرکزی صنایع بؤلگه‌سی قورولماسینا وئردیگی دسته‌یه گؤره ناظیر وارانکا تشککور ائدیب.