بوگون آخیسکا سورگونونون ایل‌دؤنومودور
"تورکییه، آخیسکا تورکلرینین بیرلیک و من‌لیکلرینی قورومالاری اوچون الین‌دن گلن هر جور قاتقی‌نی تامین ائتمه‌یی داوام ائتدیره‌جک"
خاریجی ایشلر باخانلیغی، تورکییه‌نین، آخیسکا سورگونونون ۷۵.جی ایل دؤنومونده آخیسکا تورکلرینین بیرلیکلرینی قورومالاری و یئنی نسیللره کؤچورمه‌لری اوچون قاتقی وئرمه‌یه داوام ائدیله‌جگینی بیلدیردی.
باخانلیقدان وئریله‌ن یازی‌لی آچیقلامادا، آرالارین‌دا اوشاقلارین، قادینلارین، یاش‌لیلارین دا اولدوغو تخمیناً ۱۰۰ مین آخیسکا تورکونون ۱۴ نوامبر ۱۹۴۴ده، عصرلرجه یاشادیقلاری گورجوستانین آخیسکا بؤلگه‌سین‌ده‌کی آنا وطنلرین‌دن سووئتلر بیرلیگینین اوزاق بؤلگه‌لرینه سورگون ائدیلدیگی بیلدیریلدی.
سورگونون انسانلیق دیشی شرایطین‌ده بیر چوخ آخیسکا تورکونون حیاتینی ایتیردیگینه، حیات‌دا قالانلارین دا گؤندریلدیکلری یئرلرده بؤیوک چتین‌لیکلرله حیات مباریزه‌سی وئردیگینه دقت چکیلن آچیقلامادا، دوققوز اؤلکه‌یه یاییلمیش و ساییلاری ۵۰۰ مینه چاتان آخیسکا تورکلرینین گورجوستان باش‌دا اولماق اوزره، یاشادیقلاری اؤلکه‌لرده سورگونون ۷۵.جی ایلینی آندیغی قید ائدیلدی.
آچیقلامادا، بونلارا یئر وئریلدی: "تورکییه، آخیسکا تورکلرینین اولدوقلاری اؤلکه‌لرده بیرلیک و من‌لیکلرینی قورومالاری و یئنی نسیللره کؤچورمه‌لری اوچون الین‌دن گلن هر جور قاتقی‌نی تامین ائتمه‌یی داوام ائتدیره‌جک. آخیسکا تورکلرینین آنا وطنلری آخیسکایا گئری دؤنوش پروسه‌سینین باشاری‌لی شکیل‌ده نتیجه‌یه چاتماسینی، آخیسکا تورکلرینین اولدوقلاری اؤلکه‌لرین یانین‌دا آنا وطنلرین‌ده ده دینج‌لیک و باریش ایچری‌سین‌ده حیاتلارینی داوام ائتدیرمه‌لرینی آرزو ائدیریک. سورگونون ۷۵.جی ایل دؤنومونده آخیسکا تورکلرینین درین حوزنونو ایچیمیزده حس ائدیر، سورگون‌ده حیاتینی ایتیره‌ن قارداشلاریمیزین عزیز خاطره‌سینی سایغی ایله یاد ائدیر و الله‌دان رحمت دیله‌ییریک".
