علی‌یئو، جان بولتونو قبول ائتدی
"آذربایجانین تورپاق بوتؤولویو تامین ائدیلمه‌لی‌دیر"
آمریکا بیرلشمیش ایشتاتلاری میللی گوونلیک مشاویری جان بولتون، گؤروشمه‌لر اوچون گئتدیگی آذربایجان‌دا پرزیدنت ایلهام علی‌یئو طرفین‌دن قبول ائدیلدی.
جمهورباشقانلیغیندان وئریلن آچیقلامادا، علی‌یئو گؤروشمه‌ده آذربایجان و آمریکا آراسین‌دا مختلیف ساحه‌لرده اوغورلو امکداشلیق حیاتا گئچیریلدیگینی، آمریکانین آوروپا تهلوکه‌سیزلیک و امکداشلیق تشکیلاتی مینسک قروپونون ائش باشقانی داغ‌لیق قاراباغ پروبلئمینین حل پروسه‌سین‌ده اؤنملی رول اوینادیغینی سؤیله‌دی.
آذربایجان تورپاقلارینین اوزون ایللردیر ارمنیستان ایشغالی آلتین‌دا اولدوغونو و ۱ میلیون‌دان آرتیق انسانین یوردلارینی ترک ائتمک مجبوریتین‌ده قالدیغینی خاطیرلادان علی‌یئو،
"بو، ارمنیستانین اولوسلارآراسی حقوق نورمالارینی کوبود شکیل‌ده پوزدوغونون ثبوتودور. بیرلشمیش میللتلر گوونلیک شوراسی ارمنیستان سلاح‌لی قوه‌لرینین آذربایجانین ایشغال اولونموش تورپاقلارین‌دان درحال و قیدسیز شرط‌سیز گئری چکیلمه‌سینه دایر قرارلار آلدی. ارمنیستان بو قرارلاری هئچه ساییر و مؤوجود وضعیتی قوروماغا چالیشیر. بو ایسه یولوئریلمز بیر حالدیر. آذربایجانین تورپاق بوتؤولویو تامین ائدیلمه‌لی‌دیر. آذربایجان، مینسک قروپو ائش‌باشقان اؤلکه‌لرین فعالیتلرینین نتیجه وئرجگینی اومود ائدیر" شکلین‌ده دانیشدی.
علی‌یئو، آذربایجان طبیعی گازینی آوروپایا نقل ائد‌جک گونئی گاز دهلیزی پروژه‌سینه دایر ده گؤستردیکلری دسته‌گه گؤره آمریکا رهبرلیینه تشکرلرینی چاتدیردی.
بولتون دا، آذربایجان ایله ایلیشکی‌لرین آمریکا اوچون ان اؤنملی اؤنجه‌لیک اولدوغونو وورغولایاراق سیاسی، اقتصادی، گوونلیک و دیگر ساحه‌لرده ایلیشکی‌لرین اؤنمینین آرتدیغینی سؤیله‌دی.
آذربایجانین چوخ ایستراتژیک بیر جغرافیا‌دا یئرلشدیینی قید ائد‌ن بولتون، آمریکانین آذربایجانلا انرژی، اولوسلارآراسی تروریزم، اینسان آلیش وئریشینه قارشی مباریزه و دیگر ساحه‌لرده امکداش‌لیقلارینی داها دا گئنیشله‌ندیرمک ایستدیگینی قید ائتدی.
داغ‌لیق قاراباغ مناقیشه‌سینین آذربایجان اوچون ان اؤنملی اؤنجه‌لیک اولدوغونو چوخ یاخشی آنلادیغینی ایفاده ائد‌ن بولتون، حل پروسه‌سین‌ده‌کی وضعیتی آذربایجان طرفینین نئجه دگرلندیردیگی باره‌ده داها چوخ معلومات آلماق ایستدیگینی سؤیله‌دی.
گؤروشمه‌ده آمریکا-آذربایجان ایلیشکی‌لرینین مختلیف طرفلری باره‌ده فیکیر آلیش وئریشی اولدو.
بولتون، آذربایجان خاریجی ایشلر باخانی ائلمار محمدیاروو و سوکار باشقانی رؤونق عبدالله‌یئو ایله ده گؤروشدو.
