باکیدا "کرکوک گئجه‌سی"
عراق و سوریه‌ده یاشایان تورکمن سویداش‌لاریمیزا معنوی دستک مقصدیله "کرکوک گئجه‌سی" کئچیریلیب
نوامبرین 30دا باکی‌نین خودآفرین ساراییندا عراق و سوریه‌ده یاشایان تورکمن سویداش‌لاریمیزا معنوی دستک مقصدیله "کرکوک گئجه‌سی" کئچیریلیب.
گئجه‌نی گیریش سؤزو ایله " کرکوک هارایی" سویداش‌لاریمیزا یاردیم کامپانیاسی‌نین علاقه‌لندیرمه مرکزی‌نین عضو‌لری روفت مورادلی و ژاله جعفرووا آچدیق‌دان سونرا آذربایجان هیمنی و تورکمن ائلی مارشی اوخونوب. سونرا بورچا‌لی جمعیتی‌نین صدری زلیمخان مممدلی و کلاسیک خالق جبهه‌سی صدری میرماحمود میرعلی‌اوغلو مراسیم ایشتیراکچی‌لاری قارشی‌سیندا چیخیش ائده‌رک تورکمن‌ائلی‌نین تورک دونیاسی‌نین بیر پارچاسی و آذربایجان تورک‌لوگونون آیریلماز حیصه‌سی اولدوغونو ایشتیراکچی‌لارین دقتینه چاتدیریب‌لار. تانینمیش صنعت اوستا‌لاری نوریه حسینووا، آغا‌لار بایرام، نووروز نووروزلو، سولماز کوسایئوا، شوشا ائلات موغام اوچلوگونون ایفا‌لاری ایشتیراکچی‌لار طرفین‌دن آلقیش‌لارلا قارشیلانیب. کرکوک گئجه‌سینده باکیدا تورکمن‌ائلین‌دن اولان طلبه‌لر آدین‌دان یحیی مهدی، شاعر یوسیف نغمه‌کار، عراق آذربایجان مدنی علاقه‌لر اجتماعی بیرلیگینین صدری طاهیره مممدووا چیخیش ائده‌رک کرکوک گئجه‌سی‌نین تشکیل اولونماسینا گؤره تشکیلاتچی‌لارا تشکرلرینی بیلدیریب‌لر.
کرکوک گئجه‌سینده میلی مدنییتین تبلیغی اجتماعی بیرلیک طرفین‌دن حاضیرلانمیش " تورکمن‌ائلی سنینله‌ییک" باغ‌لیق‌لی خصوصی بایراق ایشتیراکچی‌لار طرفین‌دن ایمضا‌لانا‌راق کرکوک‌لو طلبه‌لره تقدیم اولونوب. گئجه‌ده گنج مکتب‌لی‌لرین کرکوک حاقدا شعری سسلندیک‌دن سونرا "کرکوک هارایی" سویداش‌لاریمیزا یاردیم کامپانیاسی علاقه‌لندیرمه مرکزی‌نین عضو‌لری اومید پارتیاسین‌دان طالع علی‌یئو، تامیللا قولامی، کلاسیک خالق جبهه‌سیندن سودئیف صادیق‌لی، آغ پارتیا‌دان احد مممدلی، بوتؤو آذربایجان اوجاق‌لاری آدین‌دان فایق غضنفراوغلو، آذربایجان توران بیرلیگین‌دن فلورا رامضانووا، هابئله بوتؤو آذربایجان محافظه‌کارلار و میلتچی گنج‌لر تشکیلاتی تمثیلچی‌لری چیخیش ائده‌رک کرکوک دئییب، تورکمن‌ائلی دئییب گئجه‌یه قاتیلان‌لارا اؤز تشکرلرینی ایفاده ائده‌رک بو یؤنده فعالیت‌لرین داوام‌لی اولماسینا اصرار ائدیب‌لر.
کرکوک گئجه‌سی‌نین سونوندا گنج رسام‌لار مراسیم بویو چئکدیک‌لری تابلولاری تورکمن‌ائلین‌دن اولان طلبه‌لره هدیه ائدیب‌لر.
ائلمان تورک‌اوغلو ایسه اؤزو حاضیرلادیغی تورکمن‌ائلی و آذربایجان بایراق‌لارینی "کرکوک هارایی" علاقه‌لیندیرمه مرکزینه باغیشلاییب. مراسیم آذربایجان‌دان تورکمن‌ائلینه دستک چاغیریش‌لاری ایله سونا چاتیب.
سؤزچو.آذ
