آذربایجان اوردوسو گونو تورکیه‌ده

آذربایجان اوردوسو گونو تورکیه‌ده

آذربایجانین تورکیه‌دکی سفیری فایق باغیروو و سفیرلیگین دیگر رسمی نماینده‌لری تدبیره گلن مسئول قوناق‌لاری قارشیلادی‌لار.

22  ژوئن تاریخینده کئچیریلن تدبیرده تورکیه جمهوریتی‌نین علم، صنایع و تکنولوژی ناظیری فاروک اؤزلو، ترک سلاح‌لی گوجلری باش قرارگاه باشقانی حولوسی آکار، معاوینی یاشار گولر، قارا قوشون‌لاری قوموتانی، اوردو ژنرا‌لی صالح عقل‌لی چولاک، هاوا گوجلری قوتانی، اوردو ژنرا‌لی عابدین اونال و ژاندارما گوجلری‌نین باش قوموتانی، اوردو ژنرا‌لی غالیب مئندی باشدا اولماقلا تورکیه جمهوریتی سلاح‌لی گوجلری‌نین 43 ژنرا‌لی قاتیلیر.

آذربایجان میللی اوردوسونون یارانما تاریخین‌دن بحث ائدیلدیک‌دن سونرا آذربایجان جمهوریتی‌نین هیمنی و تورکیه میللی مارشی سسلندی.

تدبیرده تانینمیش اجتماعی-سیاسی شخصیت‌لر، چوخ سایدا میللت وکیلی، تورکیه خاریجی ایشلر ناظیرلیگی، دیگر ناظیرلیک‌لر، او جمله‌دن، بیر سیرا رسمی و دیپلوماتیک قوروم‌لارین نماینده‌لری تمثیل اولونوردو.

قید ائدک کی، آذربایجان جمهوریتی سلاحلی گوجلری گونو آذربایجاندا رسمی بایرام‌دیر. 1918-جی ایل 26 ژوئن تاریخ‌لی فرمانلا آذربایجان میللی اوردوسو یارادیلماغا باشلانیلیب. آوقوستون 1-ده آذربایجان خالق جمهوریتی‌نین نیظامی ناظیرلیگی تاسیس ائدیلیب. ژنرال صمد بی مهمانداروو دسامبرین 25-ده نیظامی ناظیر، ژنرال علی آغا شیخلینسکی ناظبر معاوینی تعیین اولونوب‌لار. قیسا مدتده میللی اوردو عثمانلی دولتی‌نین قافقاز ایسلام اوردوسو ایله بیرلیکده باکی‌نی و اطرافینی ارمنی-بولشئویک ایشغالین‌دان خلاص ائدیب و 28 می 1918-جی ایلده آذربایجان دولتی اعلان ائدیلیب.

1991-جی ایلین اوکتوبریندا آذربایجانین دولت موستقیل‌لیگی‌نین برپاسین‌دان سونرا آذربایجان اوردوسونون یارادیلماسی باره‌ده آذربایجان عالی سووئتی‌نین قراری‌نین قبول ائدیلدیگی تاریخ - 9 اوکتوبر آذربایجان جمهوریتی سلاح‌لی گوجلری گونو اعلان ائدیلدی. بیر نئچه ایل سونرا آذربایجان جمهوریتی پرزیدنتی‌نین 22 می 1998-جی ایل تاریخ‌لی فرمانینا اساساً اوّلکی فرمان گوجدن سالیندی ​​و 26 ژوئن تاریخی آذربایجان جمهوریتی سلاح‌لی گوجلری گونو اعلان اولوندو.

بئله‌لیکله، تاریخی واریث‌لیک عنعنه‌سینه اویغون آذربایجان خالق جمهوریتی دؤورونده میللی اوردونون یاراندیغی 26 ژوئن (1918) آذربایجان سلاح‌لی گوجلری گونو آذربایجاندا رسمی بایرام کیمی قید ائدیلیر.