آذربایجان سلاح‌لی گوج‌لر گونو قوتلو اولسون!

آذربایجان خالق جمهوریتی حکومتی‌نین قراری ایله 1918.جی ایل ژوئنین 26سیندا ایلک حربی بؤلوم اولوشدورولدو. بونون آردینجا اوردویا چاغیریش حاقیندا فرمان وئریلدی.
بو ایلین آگوست آیینین 1‌ینده حرب باخانلیغی تاسیس ائدیلیب خسرو بی سلطانوو حرب باخانی تعیین اولوندو. 1918.جی ایل دسامبرین ی25نده ایسه پروفسیونل ساواشچی، ژنرال صمد بی مهمانداروو حرب باخانی اولدو.
قیسا مدتده 30 مین‌لیک اوردو اولوشدورولدو. میلی اوردو عثمانلی امپراتورلوغونون قافقاز ایسلام اوردوسو ایله بیرلیکده 1918.جی ایل سپتامبرین 15ینده باکی‌نی ارمنی-بولشئویک ایشغالین‌دان قورتاردی و سپتامبرین 17سینده آذربایجان میلی حکومتی گنجه‌دن باکی‌یا کؤچدو.
آذربایجان 1920.جی ایلین آوریلینده بولشئویک روسیاسی طرفین‌دن ایشغال ائدیلدیک‌دن و خالق جمهوریتی‌نین دوشمه‌سیندن سونرا بولشئویک حکومتی میلی اوردونو لغو ائتدی. اوردونون 21 ژنرالین‌دان اون بئشی بولشئویک‌لر طرفین‌دن اؤلدورولدو، باشچیلارین چوخو باسقییا معروض قالیب و اؤلدورولدو.
آذربایجان 71 ایلدن سونرا باغیمسیزلیغینی الده ائتدیک‌دن سونرا 1991.جی ایل سپتامبرین 5ینده ساوونما باخانلیغی اولوشدورولوب ژنرال واله برشادلی باخان تعیین اولوندو. همین ایل اکتبرون 9وندا آذربایجان یوکسک شوراسی “سلاح‌لی گوج‌لرین اولوشدورولماسی حاقیندا” قانون قبول ائتدی. بو سبب‌دن 1998.جی ایله دک 9 اکتبر تاریخی آذربایجان اوردوسونون اولوشدورولما گونو کیمی قید ائدیلدی.
آذربایجان مرحوم پرزیدنتی حیدر علی‌یئوین 1998.جی ایل 22 می تاریخ‌لی فرمانی ایله آذربایجان خالق جبهه‌سی حکومتی‌نین ایلک حربی بؤلوگو تاسیس ائتدیگی گون یعنی 26 ژوئن هر ایل آذربایجان سلاح‌لی گوج‌لر گونو کیمی قوتلانیر.