تاریخده بو گون
۱۴ فوریه ۲۰۱۹
۱۴ فوریه سئوگیلیلر گونو بیر چوخ اؤلکه‌ده قوتلانان اؤزل بیر گون‌دور. کؤکنی، روما کاتولیک کلیسه‌سینین اینانجینا دایانیر، والنتین آدین‌داکی بیر دین آدامینین، رومالی عسگرلرین ائوله‌نمه‌سینین یاساق اولدوغو دؤورده ائوله‌نمه‌لرینه یاردیم ائتدیگی و یا عاشیقلری گیزلیجه ائولندیردیگی اوچون اؤلدورولمه‌سی افسانه‌سینه دایانیر. ۱۴ فوریه ۴۹۶ روما پاپی گلاسیوس طرفین‌دن اعلان ائدیلدیگی سؤیله‌نمکده‌دیر.
اصلین‌ده رومانتیک عشق ایله والنتین آراسین‌دا بیر باغلانتی اولمادیغی دا ادعا ائدیلیر. ۱۳۸۱ تاریخ‌لی پارلامنت اف فولس آدلی کیتابا گؤره، فرانسادا و اینگیلتره‌ده ۱۴ فوریه، گله‌نکسل اولاراق قوشلارین جوتلشمه گونو کیمی بیلینیردی. گونون بو اؤزللیگین‌دن دولایی سئوگیلیلر بیر بیریلرینه خوش سؤزلر یازان مکتوبلار وئریردی و بو مکتوبلاردا بیر بیریلرینه والنتین دئیه خطاب ائدیردیلر.
تاریخی و سببی هر نه قدر باش قاریشدیرسا دا بو گون دونیادا بیر چوخ اؤلکه‌ده ۱۴ فوریه سئوگیلیلر گونو کیمی قوتلانیر.
...
۱۴ فوریه ۱۹۴۶...الکتریکله ایشله‌یه‌ن و الکترونیک معلومات ایشله‌مه قابلیتینه صاحب ایلک بیلگی‌سایار انیاک، پنسیلوانیا اونیورسیته‌سین‌ده تانیدیلدی. II.جی دونیا ساواشی سیراسین‌دا آمریکالی بیلیم آداملاری طرفین‌دن یاپیلان انیاک، تخمیناً ۱۶۷ مربع مترلیک بیر ساحه‌یه سیغیردی و آغیرلیغی اوتوز تون ایدی. اوزون منزیل‌لی توپ و موشکلرین حسابلامالارین‌دا ایستیفاده ائتمک مقصدیله ۴ ایلده اینشا ائدیله‌ن انیاک، ساواشین بیتمه‌سی سببی ایله، ساواش سونراسی باشقا علمی ایشلرده ایستیفاده ائدیلدی. انیاکین پارچا‌لاری حاضردا واشینگتون‌داکی آمریکا اولوسال موزه‌سین‌ده سرگیله‌نیر.
...
۱۴ فوریه ۲۰۰۴...هامبورگ دوغوملو تورک یؤنتمن فاتح آخینین "دووارا قارشی" آدلی (گیگن دی واند) فیلمی، برلین اولوسلارآراسی فیلم فستیوالین‌دا ان یاخشی فیلم سئچیله‌رک "قیزیل آیی" اؤدولو آلدی. باش روللارین‌دا ملتم جومبول، گوون کراچ، سیبل ککیللی و بیراول اۆن‌ال‌ین یئر آلدیغی دووارا قارشی فیلمی ایله فاتح آخین، متین ارکسانین سوسوز یاز فیلمین‌دن ۴۰ ایل سونرا برلین فیلم فستیوالین‌دا قیزیل آیی اؤدولونو قازانان ۲.جی تورک یؤنتمینی اولدو.
