تورک جمهوریتلرینین گوندمیندهکی اولایلار
تورک دؤولتلر تشکیلاتی ساغلیق باخانلاری ۳.جو ییغینجاغی و ۲.جی تورک طب دونیاسی کنگره‌سی ۱۶ آگوست ۲۰۲۳ تاریخینده سمرقند شهرینده ائدیلدی
گئچه‌ن هفته تورک جمهوریتلرینده اؤنملی گلیشمه‌لر میدانا گلدی. ایندی بونلارا سیراسی ایله باخاجاغیق.
۱۴ آگوست ۲۰۲۳ تاریخینده قاقاووز یئری اؤزارک بؤلگه‌سی باشقانی یئوگنیا گوتسول، روسیا فدراسیونو باشکندی موسکوادا قاقاووز یئری اؤزارک بؤلگه‌سی نماینده‌لیگی آچماغی پلانلادیقلارینی بیلدیردی. بونون اوزرینه مولدووا خاریجی ایشلر و آوروپا قایناشما باخانلیغی آچیقلاما وئررک، نماینده‌لیک آچیلماسینین ایمکانسیز اولدوغونو ایفاده ائتدی. باشقان یئوگنیا گوتسول روسیا یانلی‌سی ایفاده‌لری ایله بیلینیر.
۱۴-۱۵ آگوست ۲۰۲۳ تاریخلرینده روسیا فدراسیونونا باغلی باشقوردیستان جمهوریتینین باشباخانی آندرئی نظروو قازاقیستانا ایش سفری گئرچکلشدیردی. باشباخان نظروو قازاقیستان باشباخانی آلیخان اسماعیلوو ایله گؤروشدو. گؤروشمه‌ده ایکی اؤلکه ایلیشکیلرینه باغلی چئشیدلی مؤوضوعلار ماسایا یاتیردیلدی. باشقوردیستان جمهوریتینین باشباخانی سفر چرچیوه‌سینده قازاقیستان صنایعی و آلت یاپی باخانی مارات کارابایئو ایله ده گؤروشدو.
اؤزبکیستان جمهوریتی باشباخانی عبدالله آریپوو ۱۵ آگوست ۲۰۲۳ تاریخینده قیرقیزیستانا رسمی سفر گئرچکلشدیردی. باشباخان آریپوو قیرقیزیستان باشباخانی آکیل‌بک جاپاروو ایله بیرلیکده چولپون آتا شهرینده ۱۰.جو قیرقیزیستان-اؤزبکیستان حکومتلرآراسی اورتاق امکداشلیق شوراسی ییغینجاغینا باشقانلیق ائتدی. ییغینجاق‌دا ایکی اؤلکه ایلیشکیلرینی ایر‌لییه داشییاجاق قرارلار آلیندی. قیرقیزیستان جمهورباشقانی سادیر جاپاروو اؤزبکیستانباش باخانی آریپووو قبول ائتدی.
تورک دؤولتلر تشکیلاتی ساغلیق باخانلاری ۳.جو ییغینجاغی و ۲.جی تورک طب دونیاسی کنگره‌سی ۱۶ آگوست ۲۰۲۳ تاریخینده سمرقند شهرینده ائدیلدی. ییغینجاغا تشکیلاتا عضو اؤلکه‌لرین ساغلیق باخانلاری قاتیلدی. ییغینجاق سونوندا اورتاق بیاننامه ایمضالاندی. ییغینجاق چرچیوه‌سینده ۱۶-۱۷ آگوست تاریخلرینده اؤزبکیستان - تورکیه ۲.جی ساغلیق ایش فورومو دا گئرچکلشدیریلدی.
۱۷ آگوست ۲۰۲۳ تاریخینده قازاقیستان جمهور باشقانی قاسیم جؤمرت توکایئو سعودی عربیستان چئوره، سو و اکینچیلیک باخانی عبدالرحمان الفضلینی قبول ائتدی. گؤروشمه‌ده قازاقیستان و سعودی عربیستان آراسینداکی اکینچیلیک، تیجارت، غذا گوونلیگی کیمی مؤوضوعلاردا امکداشلیق اله آلیندی.
اؤزبکیستان جمهور باشقانی شؤوکت میرضیایئو ۱۷ آگوست ۲۰۲۳ تاریخینده قازاقیستان خاریجی ایشلر باخانی مراد نورتلئونو قبول ائتدی. گؤروشمه‌ده ایکی اؤلکه ایلیشکیلرینین مؤوجود دورومو ماسایا یاتیردیلدی.
۱۷-۲۱ آگوست ۲۰۲۳ تاریخلرینده سینجان اویغور اؤزارک بؤلگه‌سینین باشکندی اورومچی شهرینده ۴.جو چین-آوراسیا: محصوللار و تیجارت ۲۰۲۳ آدلی اکسپو گئرچکلشدیردی. اکسپو آچیلیشینا قیرقیزیستان باشباخانی آکیل‌بک جاپاروو، قازاقیستان باشباخان کؤمکچیسی سئریک جومانگارین قاتیلدی. باشباخان جاپارووون رسمی سفری چرچیوه‌سینده قیرقیزیستان و چین آراسیندا ۶ آنلاشما ایمضالاندی. اکسپویا ۴۰ اؤلکه‌دن ۱۳۰۰دن چوخ شیرکت قاتیلدی.
***
۱۹-۲۰ آگوست ۲۰۲۳ تاریخلرینده آذربایجان جمهورباشقانی ایلهام علییئو، قیرقیزیستان جمهورباشقانی سادیر جاپاروو، اؤزبکیستان جمهورباشقانی شؤوکت میرضیایئو، تورکیه جمهورباشقانی رجب طیب اردوغان و تورکمنیستان جمهورباشقانی سردار بردی‌محمدوو ماجاریستانا سفر گئرچکلشدیردیلر. ماجاریستان باشباخانی ویکتور اوربانین دعوتی اوزرینه بوداپسته گلن لیدئرلر، ماجاریستانین قورولوش گونو بایرامینا و دونیا آتلئتیزم شامپیوناسینین آچیلیشینا قاتیلدیلار.
گلیشمه‌لردن گؤرولدوگو اوزره گئچه‌ن هفته تورک جمهوریتلرینده قارشیلیقلی اؤنملی سفرلر ائدیلدی.
