نوتردام کلیسهسی آلوولارا تسلیم اولدو
ویکتور هوگو: کلیسهنین عؤمرونون بیتمهسی ده چوخ یاخیندیر"
فرانسانین باشکندی پاریسدهکی نوتردام کلیسهسینده دونن آخشام ساعاتلاریندا چیخان یانغین، ۸ ساعات یاریم مداخلهدن سونرا سؤندورولدو.
یانغیندا ۹۳ متر یوکسکلیگندهکی بورجلاردن بیری و تیکیلینین دامی تامامیله چؤکدو.
تخمیناً ۵۰۰ یانغین سؤندورنین مداخیله ائتدیگی یانغیندا، چالیشمالار سایهسینده قوزئی چان/ناقوس بورجو ایله آنا بینا قورتاریلدی.
پاریس ساوجلیلیغی یانغینین سببینی آراشدیرماق اوچون سوروشدورما باشلاتدی.
فرانسادا تاریخی اثرلر ایله باغلی ایشلر گؤرن میراث وقفلریندن وئریلن آچیقلامادا، کاتدرالین تعمیری اوچون میلی یاردیم کامپانییاسی باشلادیلاجاغی بیلدیریلدی.
فرانسانین میلیاردر پینو عائلهسی، یئنی اوناریم ایشلری اوچون ۱۰۰ میلیون یورو باغیشلایاجاغینی بیلدیردی.
فرانسا مطبوعاتیندا یئر آلان خبرلره گؤره، سوسیال مئدیا پلاتفورمو تویترده بیر نئچه ساعات ایچریسینده یانغینا دایر ۱ میلیون ۶۰۰ مین پایلاشیم اولدو.
یانغینی بیر "فاجعه" اولاراق دگرلندیرن فرانسا پرزیدنتی امانوئل مکرون، "فخر ائدک، چونکو بو کلیسهنی ۸۰۰ ایلدهن داها اوزون بیر مدت اؤنجه بیز اینشا ائتدیک و عصرلر بویو بؤیودوب گلیشدیردیک. بو گئجه کسین شکیلده دئییرم، بیرلیکده یئنیدن اینشا ائدجییک" دئدی.
یانغینین سببی هلهلیک بیلینمهسه ده یانغین سؤندورمه یئتکیلیلری آلوولارین، "احتمالا"، ۶ میلیون یورولوق یئنیلهمه چالیشمالاری ندنی ایله چیخدیغینی بیلدیردی.
فرانسانین سمبولو اولاراق گؤستریلهن و ساواشلارا باخمایاراق آیاقدا قالان مشهور ۸۵۶ ایللیک قورولوشونون بؤیوک اؤلچوده ضرر گؤرمهسی، فرانسیزلار قدر دیگر آوروپالیلاری دا کدرلندیردی.
فرانسانین باشکندی پاریسده یانغینا تسلیم اولان نوتردام کلیسهسی، ۸۵۰ ایلدهن آرتیق تاریخی خریستیانلیغین بو اؤلکهدهکی سمبولو اولاراق گؤستریلیر.
نوتردامین تملی، ۱۱۶۳ده، ایکی کلیسهنین داغینتیسینی کلیسهیه چئویرمه قراری آلدیقدان سونرا پاپ آلکساندر ۳ طرفیندن آتیلدی.
اؤزللیکله فرانسا اینقیلابی دؤورونده جدی ضرر گؤرهن کلیسهده بیر چوخ دفعهاوناریم ایشی آپاریلدی.
سن چایینین ساحلیندهکی ایل دو لا سیته آداسیندا یئرلشهن و مریم آنایا اتحافاَ آدلاندیریلان نوتردام کلیسهسی، ناخیشلی پنجره شوشهلری، هیکلجیکلری و کمرلی دایاغی ایله ان چوخ توریست آغیرلایان مکانلاردان بیری اولاراق تانینیر.
هر ایل چوخ ساییدا اینسانین گزدیگی کلیسهده "مریم آنا" هیکلینین یانی سیرا، "گول پنجرهلر"، مختلیف صنعت اثرلری، بؤیوک چانلار و اورتا چاغدان قالما مبللار وار.
فرانسیز یازیچی ویکتور هوگونون ۱۸۳۱.جی ایل تاریخلی "نوتردامین قوزبئلی" اثری ایله شؤهرتی ابدیلشدیریلهن کلیسه، ۵ مین ۵۰۰ مربع مترلیک ساحهنی احاطه ائدیر.
واتیکانین "خریستیانلیغین فرانساداکی سمبولو" اولاراق آدلاندیردیغی قورولوش، پاریس باش پیسکوپوسلوغونا دا ائو صاحبلیگی ائدیر.
کلیسه، عینی زاماندا ناپلئونون امپراتور اعلان ائدیلمهسی کیمی تاریخی حادثهلره ده شاهیدلیک ائتدی.
ایلگیلیلی خبرلر
ایستانبول موسیقی فستیوالینین باشلادی
فستیوال چرچیوهسینده ۱۲ ژوئنه قدر، ۱۷ فرقلی مکاندا، ۲۵ کونسرت وئریلهجک