دونیانین ان اسکی گولوش ایموجی‌سی تاپیلدی
غازی آنتپ‌ده‌کی قارقامیش آنتیک شهرینده بو ایلکی آشاماسی تامام‌لانان قازینتی ایشلرینده اوزرینده "گولوش" ایموجی‌سی اولان 3 مین 700 ایللیک شربت کوزه‌سی تاپیلدی
دونیانین ان اسکی گولوشو قارقامیشدا.
غازی آنتپ‌ده‌کی قارقامیش آنتیک شهرینده بو ایلکی آشاماسی تامام‌لانان قازینتی ایشلرینده اوزرینده "گولوش" ایموجی‌سی اولان 3 مین 700 ایللیک شربت کوزه‌سی تاپیلدی.
سوریه سرحدینه صیفیر نقطه‌ده اولان دونیانین ان اؤنم‌لی آنتیک شهرلرین‌دن بیری اولان قارقامیشدا تورک-ایتالیالی قروپ طرفین‌دن گون ایشیغینا چیخاریلان 3 مین 700 ایللیک کوزهنین اوزرین‌دکی "گولوجوک" ایموجی‌سی دقت چکیر.
"قارقامیش آنتیک شهری"نده حیاتا گئچیریلن قازینتی‌لارا باشقان‌لیق ائدن ایتالیانین بولونیا اونیورسیته‌سی پروفسورو نیکولو مارچتی، قارقامیش آنتیک شهری‌نین میلاددان اول 2.جی مین ایل‌ده آنادولودا و مزوپوتامیادا حؤکم سورن هیتیتلرین اؤنم‌لی شهرلرین‌دن بیری اولدوغونو سؤیله‌دی.
مارچتی، تورکیه‌نین ان گئنیش معمارلیق قازینتی ساحه‌سینده چالیشدیق‌لارینا دقت چکه‌رک قارقامیشدا بو ایله قدر عمومیتله دمیر دؤورونه، گئج هیتیت دؤورونه عاید قالیق‌لار تاپدیق‌لارینی، آنجاق بو ایل هیتیت امپراتورلوغونا عاید طبقه‌لره چاتدیق‌لارینی وورغولادی.
قارقامیش کرال‌لیغینا عاید اؤنم‌لی معلومات‌لارین گون ایشیغینا چیخدیغینی ایضاح ائدن مارچتی، بو معلومات‌لار ایشیغیندا تاریخده یئنی صحیفه‌لر یازابیله‌جکلرینی ایفاده ائتدی.
نیکولو مارچتی، شهرین نئکروپول ساحه‌سینده او دؤورده تابوت اولا‌راق ایستیفاده ائدیلن کوب‌لر، اینسان‌لارین کول‌لری‌نین قویولدوغو تورپاق‌دان قاب‌لار، ساخسی‌لار، بزک اشیا‌لاری تاپدیق‌لارینی وورغولایا‌راق،
"نئکروپول ساحه‌سینده مختلیف کوپ‌لر، قاب‌لار تاپدیق. بون‌لاردان ان ماراق‌لی‌سی، میلاددان اول 1700.جی ایله عاید اوزرینده گولوجوک ایموجی‌سی اولان بیر کوزه. بو کوزه شربت ایچمک اوچون ایستیفاده ائدیلمیش. احتمالا دونیانین ان اسکی گولومسمه‌سی. بونو یاپان اوستا نه مقصدله بو ایموجینی چکمیش بیلمیریک آنجاق بیز گولوجوک اولا‌راق دگرلندیریریک" شکلینده دانیشدی.
اوزرینده گولومسمه ایموجی‌سی اولان کوزهنین پارچالانمیش اولا‌راق گون ایشیغینا چیخاریلدیغینا توخونان مارچتی، تاریخی اثرین داها سونرا اوستا تعمیرچیلر طرفین‌دن بیرلشدیریلدیگینی و اورتایا بنزرسیز بیر اثرین اورتایا چیخدیغینی بیلدیردی.
مارچتی، ایموجی‌لی کوزهنین دیگر تاپینتلارلا بیرلیکده غازی آنتپ آرکئولوژی موزه‌سینه تسلیم ائدیله‌جیینی سؤزلرینه علاوه ائتدی.
