گوندم آنالیز:21
بیرینجی ایللیگینده کؤرفز بحرانی و تورکیهنین موضعی
تقریباً بیر ایل اول قطر رسمی خبر آژانسینین اینترنت صحیفهسینین هاکرلرین هوجومونا معروض قالماسی و قطر امیرینین آدیندان بیر سیرا ساختا گوروشلرین صحیفهده یئر توتماسی ایله باشلانان مئدیا کامپانیاسینا شاهیدلیک ائتدیک. همین مئدیا کامپانیاسی زامانی عرضینده بیرلشمیش عرب امیرلیکلری و سعودی عربیستانی لیدئرلیینده امریکانین دا دستک ایله قورولان بیر کوالیسیونون قطری بیرباشا هدف گؤتورمهسینه چئوریلدی. بو کوالیسیون قطری حربی، سیاسی و ایقتیصادی باخیمدان تامامیله محاصرهیه سالاراق عینی ایله اونلارا تسلیم اولماغا مجبور ائدیردی.
زامانینا نظر سالدیقدا قطره قارشی بو حمله نین 21 می 2017-جی ایل تاریخینده سعودی عربیستانینین پایتاختی ریاض-دا امریکا پرزیدنتی دونالد ترامپین دا ایشتیراک ائتدیگی اولوسلار آراسی ایجلاسدان سونرا اولدوغونو گؤروروک.
بو چرچیوهده 2 محمد کیمی آدلاندیریلان بن سلمان و بن زاید ریاض-دا کئچیریلن ایجلاسدا ترامپین دستکینی گؤتوردوکدن سونرا آددیم آتدلارتیلار. ایسراییل ایله بیرگه تشکیل ائتدیکلری یئنی بؤلگه میسیونلارینی قطری جدی تهدید کیمی گؤروردولر و نه ین باهاسینا اولارسا اولسون بو تهدیدی آرادان قالدیرماغا جهد ائتدیلر. قطرین تورکیه کیمی آکتورلارلا عرب باهاری پروسئسیله بیرلیکده بؤلگهدکی دییشیکلیک و مقاومت پروسئسینی دستکلمهسی الینده کی مالیه گوج ایله یاناشی صاحب اولدوغو مئدیا گوجونو هدف گؤتورمهسیندکی اساس عنصورلار ایلکین پلانا چیخمیشدیر.
آنجاق کئچن بیر ایلی قیمتلندیردیگیمیز زامان قطره قارشی حملهنین هر ساحهده اوغورسوز اولدوغو گؤرولدو. تورکیه کیمی یاخین طرفداشلارینین گؤستردیگی دستک و ایمکانلار قطرین تکمینلی و منطقلی شکیلده داوام ائتدیردیگی دیپلماسی اونا یؤنلدیلمیش حملهلرده نایلیت الده ائتمهسینه ایمکان ورمهدی. نتیجه ده آرتیق امریکادا موضعینی تامامیله دییشمهیه باشلادیغینی گؤروروک.
بیرلشمیش عرب امیرلیکلری و سعودی عربیستانینین قطره تطبیق ائتدیگی تحریملر آرتیق اونلار باخیمیندان آرتیق بیر یوکه چئوریلیب.
قطر ایله بیرلیکده تورکیه ده هدف گؤتورولموشدو
قطری هدف گؤتورن کوالیسیونون ایستکلریندن بیرینین ده قطردکی تورکیهیه مخصوص حربی بازاسینین باغلادیلماسی و ایکی اؤلکه آراسیندا داوام ائدن حربی موقاویلهلرینین سونا چاتدیریلماسی اولدوغو اورتایا چیخمیشدیر. بونون ایکی سببی وار. بیرینجی سی تورکیهنین حربی دستکی اولمادان قطرین اونلار اوچون داها آسان اولاجاغینی ظن ائدیردیلر و تورکیه-نین قطردکی حربی بازاسی و قطر اردوسو ایله قبول ائدیلن حربی سازیشلر، تعلیم سازیشلری قطری اونلار قارشیسیندا داها گوجلو اؤلکهیه چئویریردی. ایکینجی کیمی تورکیهنین بؤلگهدکی حربی و سیاسی موجودلوغو 2 محمد و ایسراییل-ین بؤلگه سیاستی باخیمیندان بیر تهدید کیمی گؤرولوردو. نتیجهده فیلیسطیندن قطره قرار گئنیش بیر ایسلام جوغرافیاسینی ایستدیکلری کیمی پاسیو شکیلده فورمالاشدیرماق ایستییردیلر هم ده بو حملهلره میدان اوخویا بیلهجک قاباقجیل اؤلکهلری آرادان چیخارماق یاخود ضعیفلتمه جهدینه اوز توتدولار. البته تورکیه و قطر بو ایستکلری تامامیله رد ائدهرک ایکی طرفلی منفعت اطرافیندا حربی علاقهلرینی داوام ائتدیردیلر. خصوصیله تورکیهنین تأثیرلی سیاستی قطره یؤنلدیلمیش آددیملارین اوغورسوز اولماسیندا مهم تأثیر یاراتدی.
تورکیه اؤزونو سعودی عربیستانیدان چوخ بیرلشمیش عرب امیرلیکلرینین هدف گؤتورور کیمی دیرلندیریر، اصلینده بونونلا باغلی بیر چوخ ایشاره ده اورتایا چیخیب. بیرلشمیش عرب امیرلیکلرینین امریکا-داکی سفیری یوسف ال اوطئیبهنین مطبوعاتا سیزان ای-میل لرینده تقریباً هر پلاتفورمادا بیرلشمیش عرب امیرلیکلرینین تورکیهنین منفعتلری علیهینده نئجه کامپانیا آپاردیغینی گؤستریر. لیبی-دن سومالی-یه، سوریه-دن فرقلی بؤلگهلره قدر بیرلشمیش عرب امیرلیکلرینین ایسراییل و دیگر بعضی قاباقجیل اؤلکهلرله امکداشلیق ائدهرک تورکیه-نی هدف گؤتوردوگو چوخ آچیقدیر.
تورکیه البته ده بیرلشمیش عرب امیرلیکلرینین روشوت وئرهرک، آدام ساتین آلاراق، حتی بعضی ترور تشکیلاتلارینا دستک تامین ائدهرک اوینادیغی چیرکلی اویونا اوخشار شکیلده جاواب وئرمیر، آنجاق سومالی-ده سون دفعه باش وئرن حادثهلرده اولدوغو کیمی بیرلشمیش عرب امیرلیکلرینه ایستدیگی زامان باشا دوشدوگو دیلده جاواب وئریر.
تورکیه سیاسی قوروملاری و اردوسو ایله کؤکلو بیر دؤولت، اؤز جوغرافیاسیندا چوخ نفوذلو بیر قاباقجیل اؤلکه، بؤلگهنین ثابتلیگی اوچون عراق و سوریه کیمی اؤلکهلرده بیرباشا ساحهدهدیر. قطرله یاناشی سومالی کیمی موختلیف بؤلگه اؤلکهلری ده حربی موجودلوغونو گوجلندیریر. قودس مسئلهسینده اوینادیغی روللا ایسلام دونیاسی و گوناهسیز خالقلارین منفعتلری اوچون موباریزهسینی داوام ائتدیرجگینی گؤستریر.
"سیاست، ایقتیصادیات و جمعیت آراشدیرمالاری فوندونون امکداشی جان آجونون "بیرینجی ایللیگینده کؤرفز بحرانی و تورکیهنین موضعی" موضوع لو آنالیتیک یازیسینی تقدیم ائتدیک.