بلاروس سرحد بؤلگه‌‌لرده حربی مانوور باشلا‌ییب

بلاروس سلاحلی قوه‌‌لری روسیه‌ و اوکراین، ائله‌جه‌ ده لیتوانی و لهیستان‌ ایله سرحد بؤلگه‌‌لرده اوچ گونلوک حربی مانوور باشلا‌ییب.

بلاروس ساوونما ناظیر‌لیگینین تلگرام حسابیندان وئریلن آچیقلامادا روسیه‌‌ ایله اوکراین سرحدینده یئرلشن گومئل شهرینده و لیتوانی و لهیستان‌ ایله سرحدینده یئرلشن گرودنو شهرینده 3 گون عرضینده حربی مانوور کئچیریله‌جیی بیلدیریلیب.

بیاناتدا بیلدیریلیب کی، سرحدیانی بؤلگه‌لرده کئچیریلن مانوورون مقصدی بو بؤلگه‌‌لری هوجوم احتیمالینا قارشی مدافعه‌ ائتمک و حربی وضعیت تدبیر‌لرینین حیاتا کئچیریلمه‌سینه حاضیر‌لیق‌دیر.

بلاروس 24 فوریه‌ 2022-جی ایل تاریخیندن اعتباراً داوام ائدن روسیه‌-اوکراین محاربه‌سی سببیله اولوسلارآراسی ایجتیماعیاتین قیناما و تحریملره مراجعت ائتدیگی بیر واختدا مسکویا دیپلوماتیک دستک وئرمه‌لری و حربی امکداشلیغی داوام ائتدیرمه‌لری سببیله آمریکا و اوروپا اؤلکه‌‌لرینین تنقید هدفی اولوب.