آمریکا غزهیه دنیز یولو ایله یاردیمی آراشدیریر
آمریکا پرزیدنتی جو بایدن آمریکا اوردوسونا غزه ساحیللرینده مووقتی لیمان یاراتماغی تاپشیریب
آمریکا غزهیه اینسانی یاردیمین دنیز یولو ایله داشینماسی واریانتینی آراشدیرماغا باشلادیقلارینی آچیقلاییب.
آمریکا دؤولت دپارتمانینین سؤزچوسو متیو میلر گوندهلیک مطبوعات کنفرانسیندا، آمریکانین تعجیلی اینسانی یاردیم احتیاجلارینی قارشیلاماق اوچون سون بیر هفتهدیر غزهیه هاوا یاردیمی باشلاتما عملییاتلاری حیاتا کئچیردیگینی خاطیرلاداراق، عینی زاماندا دنیز یولو ایله علاوه یاردیم تامین ائتمک واریانتینی دا آراشدیردیقلارینی سؤیلدی.
میلر، "داها اوول دنیز یولونون قورو یاردیمینا آلترناتیو اولمایاجاغینی، قاتقی تامین ائدهجیینی ایفاده ائتمیشدیک. بو سببدن قورو یاردیمی اوچون تضییقلریمیزی داوام ائتدیرهجییک" دئدی.
غزهیه اینسانی یاردیمین چاتدیریلماسیندا بیر قدر ده ایرلیلییش اولدوغونو ایدعا ائدن میلر، یاردیمین ایلک نؤوبهده آمریکانین داخیل اولماسی سایهسینده ائدیلدیگینی، حاضیردا آمریکانین یاخشیلاشما اوچون سعی گؤستردیگینی قئید ائدیب.
میلر بو چرچیوهده ایسرائیل حؤکومتی ایله ان یوکسک سویهده تماسلارینین داوام ائتدیگینی بیلدیریب.
آمریکا پرزیدنتی جو بایدن آمریکا اوردوسونا غزه ساحیللرینده مووقتی لیمان یاراتماغی تاپشیردیغینی آچیقلاییب.
مووقتی لیمانلا دنیز یولو ایله غزهیه داها بؤیوک میقداردا اینسانی یاردیمین داخیل اولاجاغینی، لاکین آمریکا عسگرلرینین غزهیه آیاق باسمایاجاغینی ایفاده ائدن بایدن، "بو مووقتی لیمان بؤیوک میقداردا اینسانی یاردیمین هر گون غزهیه داخیل اولماسینی مومکون ائدهجک. لاکین ایسرائیل ده اوزرینه دوشنی ائتملیدیر. ایسرائیل، غزهیه داها چوخ اینسانی یاردیمین گؤندریلمهسینه ایجازه وئرمهلی و اینسانی ایشچیلرین آتشه معروض قالماماسینی تامین ائتملیدیر" دئدی.
بو آرادا یدیعوت آخرونوت قزئتینده یئر آلان خبرده ایسرائیل، حیفا لیمانینین هدف آلینما احتیمالینا گؤره اؤلکهیه گلن وارداتی قوروماق و آمریکانین غزه ساحیللرینده قورماغی پلانلاشدیردیغی لیمانا چاتمازدان اوول ماللارین یوخلانیلاجاغی بیر کئچید منطقهسی کیمی خیدمت ائتمک اوچون گونئی قبرس روم طرفیندن لیمان آلماغا چالیشیر.