حوثی لر: امریکا و اینگیلتره حدیده شهرینه هوجوم ائتدیب

یمن-ده‌کی ‌حوثی لر امریکا و اینگیلتره‌-نین اؤلکه‌نین باتی سیندا یئرلشن حدیده شهرینه هوجوم ائتدیگینی آچیقلاییب.

حوثی لره باغلی "المسیره" تلویزیونوندا یاییم‌لانان خبرده امریکا و اینگیلتره هاوا قوه‌لرینین حدیده-نین الجبنه بؤلگه‌سینه ایکی هاوا هوجومو تشکیل ائتدیگی بیلدیریلیب.

خبرده هوجوم‌لارین هدف‌لری و نتیجه‌لری ایله باغلی معلومات وئریلمه‌ییب، امریکا و اینگیلتره‌-دن هئچ بیر آچیقلاما وئریلمه‌ییب.

دیگر طرف‌دن، فرانسا قیرمیزی دنیز و عدن کؤرفزینده یمنه مخصوص ایکی اینسانسیز هاوا آراجینی ووردوق‌لارینی بیلدیریب.

فرانسا ساوونما ناظیرلیگی قیرمیزی دنیز و عدن کؤرفزینده‌کی حادثه‌لرله باغلی یازیلی آچیقلاما وئریب.

ناظیرلیک قئید ائدیب کی، فرانسانین FREMM تیپ‌لی دنیز ناوچه لری قیرمیزی دنیزین گونئی‌ینده و عدن کؤرفزینده یمن-دن گلن اینسانسیز هاوا آراج لارینین (ایها) چوخلو هوجومونو آشکار ائدیب.

آچیقلامادا 2 اینسانسیز هاوا آراجینین موداخیله ائدیله‌رک محو ائدیلدیگی، "بو موداخیله‌نین سوئز کانالیندان هرمز بوغازینا قدر دنیز تهلوکه‌سیزلیگینه تحفه وئردیگی" ایفاده ائدیلیب.

قئید ائدک کی، آوروپا بیرلیگی 20 فوریه ده قیرمیزی دنیزده سیروسفر تهلوکه‌سیزلیگینه تحفه وئرمک اوچون "آسپیدس" آدلی حربی میسیونونون ایشه سالیندیغینی آچیقلاییب.

میسیونون سیروسفر آزادلیغی‌نین برپاسینا و تیجاری گمیچی‌لیگی‌نین قورونماسینا تحفه وئرجگینی بیلدیرن آوروپا بیرلیگی "آسپید" میسیونونون یالنیز ساوونما مقصدی داشییاجاغینی قئید ائدیب.

خاتیرلاداق کی، یمن-ده ایرانین دستکلدیگی حوثی لر ایسراییلین غزه-یه هوجوم‌لارینا رئاکسیا اولا‌راق 31 اوکتبردا  ایسراییل شیرکت‌لرینه باغلی اولدوق‌لارینی سؤیلدیگی یمن ساحل‌لرینده تیجارت گمی‌لرینی اله کئچیرمه‌یه و بعضی‌لرینه ایهالار و راکت‌لرله هوجوم ائتمه‌یه باشلادی‌لار.

امریکا قوه‌لری بو مدت عرضینده دفعه‌لرله یمن-‌دن آتیلان راکت و کامیکازه ایهالاری ووردوق‌لارینی آچیقلاییب.

قلوبال تیجارتین تخمینن 12 فایزی آغ دنیزینی قیرمیزی دنیزه باغلایان و آوروپا ایله آسیا آراسیندا ان قیسا یولو تکلیف ائدن سوئز کانا‌لی واسیطه‌سیله حیاتا کئچیریلیر.