فیلیسطین خاریجی ایشلر ناظیرلیگی آرژانتین-ا رئاکسیا گؤستریب

فیلیسطین خاریجی ایشلر ناظیرلیگی آرژانتین-ین "قدس-و ایسراییلین پایتاختی کیمی تانییاجاغی و اورادا سفیرلیک آچاجاغی" ایله باغلی بیاناتینی "فیلیسطین خالقی‌نین موستقیل دؤولت قورماق حقوقونا هوجوم" کیمی قیمتلندیریب.

فیلیسطین خاریجی ایشلر ناظیرلیگیندن وئریلن یازیلی بیاناتدا آرژانتین  پرزیدنتی خاویر مایلی‌نین ایسراییله سفری زامانی اؤلکه‌سی‌نین سفیرلیگینی تل آویو-دن قدسه کؤچوره‌جک‌لری ایله باغلی آچیقلاماسینا رئاکسیا وئریلیب.

بیاناتدا بونون اولوسلار آراسی قانون‌لارا و بیرلشمیش میللت‌لر تشکیلاتی تهلوکه‌سیزلیک شوراسی‌نین قطعنامه لرینه ضد اولدوغو و سؤزوگئدن قرارین آرژانتین-ین "اؤلکه‌سینی تاریخین یانلیش طرفینده یئرلش‌دیرمکده اصرارینی و فیلیسطین خالقی‌نین موستقیل دؤولت قورما حاقینا بیرباشا هوجومو عکس ائتدیردیگی" وورغولانیب.

بیاناتدا فیلیسطین-ین قدس-ون حقوقی موضعینه محل قویمایان هر هانسی تشببوس و آددیمی رد ائتدیگی وورغولانیب.

قئید ائدک کی، آرژانتین پرزیدنتی مایلی سئچکی کامپانیاسی زامانی آرژانتین خاریجی سیاستینده "کؤک‌لو" دییشیک‌لیک‌لر ائدجگینی وورغولایا‌راق، دقت‌لرینی امریکا و ایسراییله یؤنلده‌جک‌لرینی بیلدیریب.

سئچکی کامپانیاسی زامانی پرزیدنت‌لیگی قازاناجاغی تقدیرده آرژانتین-ین تل آویو سفیرلیگینی قدسه کؤچورجگینه سؤز وئرن مایلی ایسراییلین غزه-یه هوجوم‌لارینی دا دستکله‌ییب.

ایسراییل 1967-جی ایلده ایشغال ائتدیگی دوغو قدس-و داخیل ائدیب، 1980-جی ایلده ایسه بیرطرف‌لی قایدادا قدس-و "پایتاختی" اعلان ائدیب.

لاکین دونیانین بیر چوخ اؤلکه‌سی قدس-و ایسراییلین پایتاختی کیمی تانیمیر و سفیرلیک‌لری تل آویو-ده یئرلشیر.