داعش لیدئرلریندن السودانی اؤلدورولدو
سودانینین "داغلیق بیر ماغارادان" داعش ترور هؤرگوتونون آفریقا قارهسی و افغانیستان باشدا اولماق اۆزره دونیا میقیاسینداکی عملیاتی فعالیتلرینه مالی و لجستیک دستک تامین ائتدیگی بیلدیریلدی
آمریکا بیرلشمیش دؤولتلریندن یوکسک سویهلی مقاملار، ترور هؤرگوتو داعشین اؤنده گلن آدلاریندان بلال السودانی ایله ۱۰ عضوونون سومالیده گئچیریلهن عملیاتدا اؤلدورولدوگونو آچیقلادی.
آدلارینین آچیقلانماسینی ایستهمهیهن ایکی یوکسک روتبهلی آمریکا بیرلشمیش دؤولتلری مقامی، تشکیل ائتدیکلری آنلاین توپلانتیدا، ۲۰۱۲-جی ایلده آمریکا بیرلشمیش دؤولتلری مالیه باخانلیغینین تحریم لیستینه گیرن سودانینی اله گئچیرمک اوچون دونن گئجه سومالینین قوزئییندهکی «داغلیق بیر ماغارا»یا تشکیل ائدیلهن باسقین حاقیندا مطبوعات منسوبلارینا معلومات وئردیلر.
سودانینین، آمریکا بیرلشمیش دؤولتلری اوردوسونون حیاتا گئچیردیگی عملیات زامانی چیخان چاتیشمالاردا اؤلدورولدوگونو قید ائدن مقاملار، عملیات نتیجهسینده مولکی و یا عسگر اؤلومون اولمادیغینی، یالنیز بیر آمریکا بیرلشمیش دؤولتلری عسگرینین عملیات ایتی طرفیندن یارالاندیغینی بیلدیردی.
سؤزوگئدن باسقینین پلانلاشدیریلماسینین آیلار سوردوگونو بیلدیرهن مقاملار، آمریکا بیرلشمیش دؤولتلری ساوونما باخانلیغی پنتاگون طرفیندن گئچهن هفته بیلگیلندیردیگی باشقان جو بایدنین ده بو هفتهنین اولینده عملیاتا اونای وئردیگینی بیلدیردی.
مقاملار، سودانینین "داغلیق بیر ماغارادان" داعش ترور هؤرگوتونون آفریقا قارهسی و افغانیستان باشدا اولماق اۆزره دونیا میقیاسینداکی عملیاتی فعالیتلرینه مالی و لجستیک دستک تامین ائتدیگینی بیلدیردیلر.
بو ایکی آمریکالی مقام، سودانینین داعشه قوشولمادان اول ده «اوزون بیر ترور گئچمیشی» اولدوغونو قید ائدرک، سومالی حکومتی داخیل، ترورلا موباریزه قونوسوندا آمریکا بیرلشمیش دؤولتلرینین دیگر اؤنملی متفیقلرینی ده عملیاتلا باغلی بیلگیلندیردیکلرینی قید ائتدیلر.
ایلگیلیلی خبرلر
فیلیسطینه دستک نوماییشلری داوام ائدیر
دونیانین بیر چوخ یئرینده مینلرله اینسان ایسرائیلین غزه زولاغینا هوجوملارینا اعتیراض ائدیب