پرایس: بو منه دلیلیک تانیملاریندان بیرینی خاطیرلادیر
"بیزیم پرسپکتیویمیزدن باخاجاق اولساق بو منه دلیلیک تعریفلریندن بیرینی، یعنی فرقلی بیر نتیجه الده ائتمک اوچون عینی شئیی تکرار تکرار ائتمهیی خاطیرلادیر"
آمریکا بیرلشمیش دؤولتلری خاریجی ایشلر باخانلیغی سؤزچوسو ند پرایس، روسیانین ۲۴ فوریهدن بو یانا داوام ائدن اوکراینا ساواشیندا داواملی قوموتان دییشدیرهرک فرقلی نتیجه الده ائتمهیه چالیشدیغینی و بونو "دلیلیگه" بنزتدیگینی سؤیلهدی.
باشکند واشینگتندا تشکیل ائتدیگی گوندهلیک مطبوعات کنفرانسیندا "روسیا باش قرارگاه باشقانی والری گراسیمووون اوکرایناداکی عملیاتدان مسوروملو مشترک عسگری گوجلرین باشینا گتیریلمهسینه" باغلی سوالی جاوابلایان پرایس، بو وظیفهلهندیرمه ایله روسیانین ساواشدا نه آماجلادیغینی موسکوایا سوروشماق لازیم اولدوغونو سؤیلهدی. ند پرایس،
"بیزیم پرسپکتیویمیزدن باخاجاق اولساق بو منه دلیلیک تعریفلریندن بیرینی، یعنی فرقلی بیر نتیجه الده ائتمک اوچون عینی شئیی تکرار تکرار ائتمهیی خاطیرلادیر. روسیا هر سفرینده داها اوست روتبهلی، داها تجروبهلی، احتیمالاً داها تأثیرلی باشچیلار تعیین ائدرک هر سفرینده عینی نتیجهیه چیخیر؛ اوکراینانین اؤزونو مدافعه ائتمه دووارینی، اؤلکهلرینی مدافعه ائتمهیه آدانمیش اوکراینالی مدافعهچیلری گؤرور. روسیا هر سفرینده یئنی بیر قوموتان تعیین ائدرک ساواشین دینامیکلرینی دییشدیرمهیی اومود ائدیر اولابیلیر اما اورادا تمل دینامیک دییشمهیهجک. او دا اوکراینالیلارین اؤز تورپاقلاری اوچون ساواشماسیدیر" دئدی.
اوکراینا اوردوسو تورپاغی، دموکراسیسی اوچون ساواشرکهن، روس اوردوسونون تورپاق آلما ساواشینا گیریشدیگینی ایفاده ائدن پرایس، اوکراینا اوردوسونون ساواش ساحهسینده تأثیرینی گؤسترمهیه و تورپاقلارینی مدافعه ائتمهیه داوام ائدجگینه اولان گووهنلرینین تام اولدوغونو ایفاده ائتدی.
روسیا ساوونما باخانلیغیندان ائدیلهن یازیلی آچیقلامادا، روس اوردوسونون اوکراینایا قارشی اۆست سویه باشچی سویهسینده دییشیکلیکلرین ائدیلدیگی و گراسیمووون مشترک عسگری گوجلرین باشینا گتیریلدیگی بیلدیریلمیشدی.