ایرانین ووردوغو اوکراینا اوچاغی ایله باغلی گیزلی سس فایلی یاییملاندی
گیزلی سس فایلینداکی شخصین ایران خاریجی ایشلر باخانی محمد جواد ظریف اولدوغو ادعا ائدیلیر
کانادانین رسمی یایین قورولوشو سی‌بی‌سی، اوکراینا هاوا یوللاری یولچو اوچاغینین ایرانین سپاه اوردوسو طرفین‌دن ۸ ژانویه ۲۰۲۰-جی ایل تاریخین‌ده دوشورولمه‌سینه دایر گیزلی بیر سس فایلینا چاتدیقلارینی آچیقلادی.
سی‌بی‌سی‌ده یئر آلان خبرده گیزلی سس فایلینین کانادا حکومتی و گیزلی سرویسینین الین‌ده اولدوغو بیلدیریلدی و سس فایلینداکی شخصین ایران خاریجی ایشلر باخانی محمد جواد ظریف اولدوغو ادعا ائدیلدی.
خبرده ظریف‌ین پی‌اس۷۵۲ سفر ساییلی اوچاغین دوشورولمه‌سی ایله باغلی دایر حقیقتین اصلا آچیقلاناممایاجاغینی قبول ائتدیگینین فایلدا یئر آلدیغی بیلدیریلیر.
خبره گؤره، ظریف دانیشماسیندا اوچاغین دوشمه‌سینین اؤنجه تصادف اولدوغونو آنجاق داها سونرا «جاسوسلارین» اوچاغی قصداً ووردوغونو سؤیله‌ییر.
ظریف "بونون متشکل قصدی بیر حرکت اولدوغونو فرض ائتسه‌نیز بئله، هئچ واخت بیزه و یا باشقاسینا سؤیلمزلر. بونون احتیمالی یوخدور. جاسوس اولابیلیرلر. مینلرجه احتیمال وار. بلکه ده حقیقتا ساواش اوزوندن و راداردان قایناقلانیردی" دئییر.
ظریف، حادثه‌نین مسئوللارینین راحاتجا اورتایا چیخمایاجاغینی سؤیله‌دیگی دانیشماسیندا،
"حقیقتین اصلا آچیقلانماماسی اوچون سببلر وار. نه بیزه، نه ده باشقالارینا سؤیله‌مه‌یه‌جکلر. چونکو آچیقلاسالار، اؤلکه‌نین مدافعه سیستملرینه ملی ماراقلارا اویغون اولمایان بعضی قاپیلار آچیلاجاقدیر" دئییر.
جواد ظریف، سس فایلینداکی دانیشماسی سیراسیندا "مسئله‌نی" قاپادماق اوچون خسارته بیر دفعه‌دن چوخ اشاره ائدیر.
سی‌بی‌سی‌نین خبرینده، سس فایلینداکی دانیشمانین اوچاغین دوشورولمه‌سین‌دن بیر نئچه آی سونرا باش وئردیگی بیلدیریلیرکن، سس فایلینین اوریژینال حالینا ایسه یئر وئریلمه‌دی.
کانادا باشباخانی جاستین ترودونون بو مؤوضوعدا چالیشان اؤزل مشاوری رالف گوودال، سی‌بی‌سی‌یه حکومتین سس فایلین‌دان خبردار اولدوغونو سؤیله‌دی.
فایلین بیر نسخه‌سینی ۲۰۲۰-جی ایلین نوامبرین‌دا آلدیقلارینی سؤیله‌یه‌ن گوودال، سس فایلیندا حساس بیلگیلر اولدوغونو و آیرینتیلارینی آچیقلامانین بعضی اینسانلاری ریسکه آتابیله‌جگینی بیلدیردی.
