بمت اورتا دوغو ایله باغلی خبردارلیق ائتدی

بیرلشمیش میللت‌لر تشکیلاتی‌نین باش کاتیبی‌نین سؤزچوسو استفان دوژاریک اورتا دوغو یئنی بیر چاخناشما قارشی‌سیندا دایانا بیلمه‌یه‌جگینی بیلدیردی.

دوژارریک گونده‌لیک مطبوعات بریفینقینده مسئله ایله باغلی بون‌لاری قئید ائتدی: "ایسرایل، غزه، لبنان، سوریه، عراق و سعودیه عربیستانی دا داخیل اولماقلا، بؤلگه‌ده جمعه گونون‌دن بو یانا پیلوت‌سوز اوچان آپارات‌لاری، راکت و هاوا هوجوم‌لارینی موشاهیده ائدیریک. باش کاتیب آنتونیو گوترش ده هر زامان اورتا دوغو یئنی بیر چاخناشما قارشی‌سیندا دایانا بیلمه‌یه‌جگینی سؤیلییر".

قئید ائدک کی، آوقوستون 25-ده، گئجه ساعات‌لاریندا لبنان-ین پایتاختی بیروت-ون گونئی ینده ایسرایله عایید 2 پیلوت‌سوز اوچان آپارات دوشوب.

اؤتن گون ده اؤلکه‌نین دوغوسونداکی بقا بؤلگه‌سینده یئرلشن فیلیسطین خالق قورتولوش جبهه‌سی – باش قوموتانلیغینا عایید موضع لرین ده گئجه ساعات‌لاریندا 3 دفعه هاوا هوجومونا معروض قالدیغی بیلدیریلیب.

ایسرایله مخصوص پیلوت‌سوز اوچان آپاراتلار، دؤیوش طیاره‌لری و دؤیوش بوت لاری تئز-تئز لبنان سرحدلرینی پوزور. لبنان-لی رسمی‌لر بو پوزونتولار باره‌سینده بمت-یه معلومات وئریرلر.

یمن-ده کی ایران-ین دستک وئردیگی حوثی لر ایسه اؤتن گون سعودیه عربیستانی‌نین پایتاختی ریاض-داکی مهم حربی موضع لری پیلوت‌سوز اوچان آپارات‌لار ایله ووردوق‌لارینی بیلدیریلب‌لر. سعودیه عربیستانی طرفیندن هله کی، مسئله‌یه دایر آچیقلاما وئریلمه‌ییب.