خریستیان دموکرات بیرلیک پارتیسی یئنی صدرینی سئچیر

آلمانیا باش ناظیری و خریستیان دموکرات بیرلیک پارتیسی‌نین (CDU) صدری آنگلا مرکلین پارتی لیدرلیگینه یئنی‌دن نامیزد اولمایاجاغینی آچیقلاماسیندان سونرا اونون یئرینه کئچه‌جک شخصین آدی بو گون معلوم اولا‌جاق.

خریستیان دموکرات بیرلیک پارتیسی‌نین (CDU) هامبورگ-دا کئچیریله‌جک 31-جی قورولتاییندا صدرلیک وظیفه‌سی اوچون باش کاتیب آنگرت کرامپ کارنباور، سابیق میللت وکیلی فریدریش مرتس و ساغلیق ناظیری ینس اسپاهن یاریشا‌جاق‌لار.

قورولتایدا 1001 نوماینده خریستیان دموکرات بیرلیک پارتیسی‌نین صدرینی سئچه‌جک.

56 یاش‌لی آنگرت کرامپ کارنباور پارتی‌نین صدری سئچی‌لرسه، باش ناظیر آنگلا مرکلین سیاستینی داوام ائتدیره‌جک.

مرکلین ایسته‌یی ایله سارلاند ایالتی‌نین باش ناظیری وظیفه‌سینی بوراخا‌راق، فوریه آییندا خریستیان دموکرات بیرلیک پارتیسی‌نین باش کاتیبی سئچیلن کرامپ-کارنباور پارتی ایچینده جدی دستکی وار. "مینی مرکل" اولا‌راق دا آدلان‌دیریلان کرامپ-کارنباور مرکلین کوچ سیاستینی مودافعه ائدیر.

پارتی صدری وظیفه‌سی اوچون نامیزدلیگینی ایره‌لی سورن دیگر گوجلو سیما ایسه فریدریش مرتس دیر.  مرتس پارتیده  چکیسی اولان فدرال مجلیس صدری و سابیق مالیه ناظری ولفگانگ شویبله طرفیندن دستک‌لنیر.

مرکلین سیاست‌لرینی تنقید ائدن و پارتی‌نین ساغ قانادی‌نین "اومید" اولا‌راق سجیلندیردیگی 62 یاشلی مرتس کوچ مسئله‌سینده داها سرت سیاست یورودجگینی و آشیری ساغچی آلمانیا اوچون آلترناتیو پارتیسی‌نین (AfD) یوکسلیشی‌نین قارشی‌سینی آلاجاغینی وعد ائدیر.

پارتی ایچی موخالیفتین اؤنده گلن سیمالاریندان‌ اولان 38 یاشلی ینس اسپاهن‌ین ایسه صدر سئچیلمه احتیمالی یوکسک دئییل.

آلمانیادا 7 آیدیر ساغلیق ناظیری وظیفه‌سینی ایجرا ائدن و نامیزدلردن ان گنجی اولان اسپاهن مرکلین کوچ سیاستینی تنقید ائتمیش و بیر زامان‌لار پارتی ده کی گنج‌لر طرفیندن دستکلنمیشدی.

قورولتایدا پارتی نین باشقا عضو‌لری‌نین ده نامیزد گؤستریلمه احتیمالی وار.

خریستیان دموکرات بیرلیک پارتیسی‌نین صدرلیگی اوچون نامیزد اولماق ایسته‌ین ایش آدامی 62 یاش‌لی آندرس ریتزنهوف آلمان خبر آژانسی DPA-یا وئردیگی موصاحیبه‌ده ان آزی بیر نماینده‌نین اؤزونو نامیزد گؤسترجگیندن اومیدوار اولدوغونو بیلدیردی. ریتزنهوف نماینده‌لرله بو مسئله اطرافیندا فیکیر موبادیله‌سی آپاردیغینی قئید ائتدی.

31 -جی خریستیان دموکرات بیرلیک پارتیسی‌نین قورولتاییندا پارتی‌نین صدری سئچیله‌جک شخصین نوبتی سئچکی‌لرده پارتی‌نین باش ناظیر نامیزدی اولاجاغی گؤزلنیلیر.

قئید ائدک کی، مرکل اکتبر آیی‌نین سونوندا پارتی لیدرلیگینه یئنی‌دن نامیزد اولمایاجاغینی و بو قانون وئریجی‌لیک ایلی‌نین سونونا قدر باش ناظیر وظیفه‌سینی داوام ائتدیرجگینی آچیقلامیشدی.