امریکادا سئچیجیلر ارکن سس وئردی

امریکادا آرا سئچکی‌لردن اول کئچیریلن ارکن سس وئرمه‌ده 34 میلیون سئچیجی ایشتیراک ائتدی.

امریکاداکی ارکن سس وئرمه پروسه سینی تعقیب ائدن فلوریدا اونیورسیته سینین "سئچکی پروژه سی" شعبه‌سی‌نین یایدیغی معلوماتدا سس وئرمه فایزی‌نین اوولکی آرا سئچکی‌لرله موقاییسه‌ده آرتدیغی بیلدیریلیر.

معلوماتا گؤره، 2014-جی ایلده کئچیریلن آرا سئچکی‌لرین ارکن سس وئرمه پروسه سینده 27 میلیون سس وئریلدیگی حالدا، بو ایل بو رقم 34 میلیونا چاتیب.

بعضی ایالت لرده وئریلن سس سایی‌نین اوولکی آرا سئچکی‌لردکی عمومی سس سایینی دا کئچدیگی ایفاده اولونور.

اونیورسیته‌نین معلوماتیندا بو آنا قدر ایستیفاده ائدیلن سس‌لرین 42%-نین دموکرات‌لارا، 36%-نین ایسه جمهوریت چیلره وئریلدیگی تخمین اولونور.

اوزمانلار امریکا مئدیاسیندا آرا سئچکی‌لری شرح ائده‌رک، امریکا پرزیدنتی دونالد ترامپین دئدیک‌لرینی قبول ائدن طبقه‌لرله ترامپا قارشی اولانلارار آراسینداکی قطب لاشمانین چوخ سئچیجی‌نین ایشتیراکینا سبب اولدوغونو دوشونورلر.

امریکادا قانونی اولا‌راق 37 ایالت ده ارکن سس وئرمه حقوقو وار.

اؤلکه‌ده کئچیریله‌جک آرا سئچکی‌لرده امریکا کنگره سی‌نین آلت قانادی اولان نوماینده‌لر مجلیسی بوتونلوکله، سنادا 35 سناتور و 36 ایالتین والیسی دییشه‌جک.

کئچیریلن سون سورغولارین نتیجه‌لرینه گؤره، دموکرات‌لار پارتیسی نماینده‌لر مجلیسینده چوخلوق الده ائده‌جک، سنادا ایسه جمهوریت چیلر پارتیسی مؤجود اکثریتی قورویوب ساخلایا‌جاق.