اسکی دؤولت باشقانی توتوقلاندی

گونئی کره‌ده اسکی دؤولت باشقانی پارک گون-هه، وظیفه‌سین‌دن عزل‌ائدیلمه‌سینه سبب اولان سوء ایستیفاده قالماقا‌لی ایله ایلگیلی اولا‌راق توتوقلاندی.

یونهاپ آژانسی‌نین خبرینه گؤره، سئول مرکز بؤلگه محکمه‌سی، روشوت، وظیفه‌دن سوء ایستیفاده، باسقی و حکومت سیرلری‌نین سیزدیریلماسییلا سوچلانان پارک حاقیندا توتوقلاما امری چیخاردی.

توتوقلاما امری، محکمه‌ده دونن ائدیلن و تخمینا 9 ساعات داوام ائدن دوروشمانین/جلسه‌نین سونوندا وئریلدی.

دوروشمایا ایکی وکیلی ایله قاتیلان پارک، ژورنالیست‌لرین سوال‌لارینی جاواب‌سیز بوراخدی.

اؤلکه تاریخینده عزل ائدیلن ایلک دؤولت باشقانی اولان پارک، یاخین دوستو چه سون سی واسطه‌سیله اؤلکه‌نین بؤیوک هولدینگلریندن هدیه آدی آلتیندا روشوت آلماق و قارشیلیغیندا مخاطب‌لرینه سیاسی چیخار‌لار تامین ائده‌رک وظیفه‌سیندن سوء ایستیفاده ائتمکله سوچلانیر.

گونئی کره پارلمانی، 9 دسامبر 2016دا پارک حاقیندا سوروشدورما آچیلماسینا قرار وئرمیش و پارکین یئتکیلری گئچیجی اولا‌راق باشباخان هوانگ کیو-آهنا وئریلمیشدی.

آنایاسا محکمه‌سی‌نین 8 حاکم‌دن اولوشان هیاتی، 10 مارسدا پارکین دؤولت باشقان‌لیغی وظیفه‌سین‌دن عزل ائدیلمه‌سینه اوی بیرلیگی قرار وئرمیشدی.