اف بی ای کلینتون ایله باغلی سوروشدورمانی باشا چاتدیردی
فدرال سوروشدورما بوروسو (FBI ) سئچیمه اون گون قالمیش "یئنی معلوماتلار وار" دئیهرک سوروشدورمانی باشا چاتدیردی.
آمریکادا نوامبرین 8-ده (صاباح) کئچیریلهجک پرزیدنت سئچکیلرینه چوخ آز قالماسینا باخمایاراق نامیزدلر سون کوزلارینی اوینارکن، دئموکراتلار پارتیسینین نامیزدی هیلاری کلینتون-ون الکترون پست ایله باغلی آپاریلان سوروشدورما گوندمده قالماغا داوام ائدیر.
فدرال سوروشدورما بوروسو (FBI ) سئچیمه اون گون قالمیش "یئنی معلوماتلار وار" دئیهرک سوروشدورمانی باشا چاتدیردی.
سوروشدورما هیلاری کلینتونون شخصی الکترون پست حسابیندا یئنی یازیشمالار اولدوغو سببیله آپاریلیردی.
اف بی ای باشقانی جیمز کومی کنگرهیه وئردیگی آچیقلامادا آپاریلان آراشدیرمالاردان سونرا کلینتون ایله باغلی وئریلن قراردا بیر دگیشیک لیک اولمادیغینی، دئموکراتلار پارتیسینین نامیزدینه هر هانسی بیر اتهام وئریلمهدیگینی بیلدیردی.
کلینتون جبههسی پروبلمین حل ائدیلمهسی ایله باغلی راضیلیغینی ایفاده ائتدی. لاکین جمهوریتچیلر پارتیسی وضعیته فرقلی بیر جهتدن باخیر.
دونالد ترامپ-ین کامپانیا مودیری: "اف بی ای –ین قراری عینی قالیبسا، بو کلینتونون دقتسیزلیگی و گیزلی بیلگیلر حاقیندا یالان سؤیلهدیگی مناسینا گلیر" دئدی.
آمریکا نمایندهلر مجلیسینین باشقانی پال ریان ایسه، قرارا باخمایاراق، کلینتونو تنقید ائدهرک:"اف بی ای -ین الده ائتدیگی سون بیلگیلره باخمایاراق هیلاری کلینتون اؤلکهنین سیرلرینی ریسکه آتمیشدیر" دئدی.
بو قرارین صاباح کئچیریلهجک سئچکیلردن اول سئچیجیلرین وئرهجکلری سسلره نئجه تأثیر ائدجگی ماراق دوغورور.